Кадетле - от ёчюлтюучюледе къонакъда

Сегизинчи номерли от ёчюлтюу-къутхарыу бёлюмде къонакъда Бабугентни школ-интернатыны кадетлери болгъандыла, деп билдиредиле МЧС-ни республикада Баш управлениясыны пресс-службасындан.

Сабийлени окъутууда къоркъуусузлукъну жорукъларына юйретиу уллу магъананы тутады. Ол жаны бла аслам ишни къутхарыу бёлюмле толтурадыла. Алай бла кадетлени от ёчюлтюучюле бла тюбешиулери къутхарыу службаны тарыхы бла шагъырейлениуден башланнганды. Жаш адамла ведомствода къуллукъ этиу, от ёчюлтюучюню усталыгъын къайсы учреждениялада алыргъа боллугъуну юсюнден соргъандыла. Черек районну  надзор эм профилактика бёлюмюню инспекторлары алагъа жууапла бергендиле, ведомствону вузларыны, от тюшгенни юсюнден билдириу келгенлей не этерге кереклисини юсюнден айтхандыла, экстренный службаланы къалай чакъырыргъа боллугъун эсгертгендиле. Ызы бла алагъа частьда экскурсия къуралгъанды, къутхарыучула сабийлеге юйретиу классланы, от ёчюлтюучюле тургъан жерлени кёргюзтгендиле. Андан сора ала барысы да бирге от ёчюлтюу бёлюмню гаражына баргъандыла. Къонакъбайла энчи оборудованияларыны, от ёчюлтюучю машиналарыны онгларыны юсюнден билдиргендиле. Кадетле аланы айтханларына сейир эте тынгылагъандыла, къутхарыучуланы кийимлерин кийгендиле, кислород-солуу аппарат бла солугъандыла. Сюйгенле уа от ёчюлтюу машинагъа да миннгендиле.

Черек районда къырал инспектор Къазакъланы Адам ала окъуучулагъа экскурсияланы дайым къурагъанларын билдиргендиле. «Быллай башламчылыкъла сабийлени от тюшюуге къоркъуусузлукъну сакълау жаны бла билимлерин бегитедиле, кеслерин да хата келтирмезча жюрютюрге юйретедиле. Сора жаш тёлюню арасында от ёчюлтюучюню ишини даражасын кётюредиле», - дегенди ол.