Черек район

Сабийлени кёллерин алгъандыла

Кёп болмай Нальчикде  "Радуга" реабилитация арагъа   Запорожье  областьдан ата-аналары бла бирге  саулукъларын  кючлерге онтёрт сакъат сабий келгенди.  Алагъа учрежденияны келечилери  жарыкъ бетден тюбеп, ахшы къонакъбайлыкъ этгендиле. Ол санда тийишли халда реабилитация бардырырча программа да жарашдыргъандыла. Алай бла  ала  мында 21 кюн чакълы турлукъдула. 

Бу кюнледе уа жаш тёлюню патриот сезимлерин кючлеу жаны бла   "Единство" жамауат организацияны эм   Герпегежни депутатлары къурап ала Чирик кёлледе, Огъарты Малкъарда да  болгъандыла.  Къонакъла  табийгъатыбызгъа болмагъанча бек  бюсюрегендиле, миллет азыкъларыбызны да жаратхандыла. Саулай алып айтханда,  черекчиле сабийлени кёллерине жеталгъандыла.
 

Ахлулары бла тюбеп   жапсаргъандыла

Кёп болмай Черек  районну администрациясыны башчысы Къулбайланы Алан энчи аскер  операциягъа (СВО) къатышханланы  аналары эм  юй бийчелери бла тюбешгенди. Анга КъМР-ни Башчысыны кенгешчиси Алесей  Храмцов, Ата журтну аскерчилерини юйюрлерини комитетини бёлюмюню  председатели  Карина Орехова,  эллени таматалары эм башхала къатышхандыла.    Анда баш тема комитет бла тири  байламлыкъ жюрютюуню юсюнден баргъанды.   
Комитет керек заманда  ариу сёзден  сора да, тюрлю-тюрлю сорууланы тамамлауда себеплик этерчады.  Ол санда  психология болушлукъ берилирча, право жаны бла  эсгертиуле алырча,  социал пособияла тёленирча эм башха затла да. 
Жыйылыуда аскерчилени юйюрлерине къошакъ халда къаллай билеклик этилсе иги боллугъу да сюзюлгенди.
 

Жамауат аслам хайырланнган жерле игилендирилликдиле

Былтыр Къабарты-Малкъарны 100 -жыллыгъына жораланнган конкурсну чеклеринде чыгъарылгъан эсеплеге кёре,  Черек  районнга кирген жерде  стела жангыртыллыкъды.

Эсге сала айтсакъ,  эл жерлени жашиллендириу жаны бла конкурсда Аушигер биринчи жерге чыкъгъанды.  Болсада элчилени оноуу бла ахча  Урван  жанындан кирген жерде стеланы жангыртыргъа къоратыллыкъды.  

Аны чеклеринде объектни  мурдорун кючлерикдиле,  уллу билдириу щит саллыкъдыла эм кече неон чыракъла бла жарытырча  мадар этилликди.

Дагъыда «Гитче шахарлада бла элледе тийрелени игилендириу»  жетинчи битеуроссей конкурсну эсеплерине кёре, республиканы онтёрт элинде тийишли  ишле тамамланырыкъдыла.  Ол санда жангы  бульварла, скверле, аллеяла, паркла къураллыкъдыла. Проектге  кёре  Бабугентде Маданият юйню арбазы  айбатланырыкъды эм Къашхатауну  Мёчю улу ара орамында жаяу жюрюгенлеге зона салынырыкъды.  
 Эсге сала айтсакъ, социал магъаналы  жерлени игилендириу  жамауатны сайлаууна кёре барады. Былтыр  республикада тапландырыргъа керек жерле ючюн 73 мингден аслам адам къол кётюргенди.

Таза  суу бла сылтаусуз болурча

Черек район къыйматлы программалагъа  тири къатышады. Ол санда «Таза суу» миллет проектге да. Алгъаракълада аны чеклеринде  «Къара-Суу - Бабугент- Къашхатау-Аушигер» ыз бла суу  жеберилгенди. Ол  "Гарант-М" биригиуню кючю бла тамамланнганды. Социал магъаналы объектни  узунлугъу 1600 метрге жетеди.

Энди аны хайыры бла Бабугентни, Къашхатауну, Аушигерни саулай да онбеш мингден аслам адамы таза суу бла сылтаусуз боллукъдула. Дагъыда  буруннгу жылда КъМР-ни Башчысы  Казбек Коковну буйругъу бла  Аушигерде  18,5 километр чакълы суу тартылгъанды.