Аны жашау жоругъу – чурумладан къачмазгъа, алгъа таукел барыргъа

Миллетибизде жашауда кеслерини жерлерин табаргъа, хар жаны бла да айныргъа итиннген иш кёллю жашларыбыз бла къызларыбыз кёпдюле. Ол къууандырмай  къоймайды. Мени бюгюннгю жигитим Гуппойланы Зульфия да аллай жигер къызларыбыздан бириди. Ол эрттеден мурат этген, жюреги да тартхан ишни къурагъанды.

 Зульфия  Къашхатауда туугъанды, элде орта школну бошагъандан сора  Къабарты-Малкъар къырал университетни экономика факультетини туризм бёлюмюне киргенди. Аны да бошдан сайламагъанды - туризм бла кюреширге Зульфия эрттеден  мурат этгенди, тыш  къыралланы табийгъатлары, маданиятлары, халкълары бла танышыу анга бек сейир кёрюне эди. 

– Университетни бошагъанымдан сора, сынам алайым деп, туризм бла байламлы бир-эки  фирмада  ишлегенме.  Ол манга бу ишни «ичинден» билирге онг бергенди. Сора кесими  фирмамы ачаргъа таукел болама. Юйюрюм да манга билеклик этеди, кёллендиреди. Алай  ишими башлагъанлай, коронавирус ауруу жайылады. Ол заманда энди ачылгъанла угъай, эрттеден бери ишлеген фирмала да жабылып бара эдиле, – дейди Зульфия. 

Алгъа ол бек абызырагъанын да жашырмайды, алай терк окъуна эс жыйып, бу иш бла байламлы шартланы, билдириулени, юлгюлени да табып,  башын кётюрмей окъуп, тыш къыралла бла алагъа туристлени жибериуню юсюнден  келишимле къурап башлайды. 

– Жукъгъан ауруу кенг жайылгъан кезиюуде тыш къыраллагъа адамланы ашырыргъа бек къыйын эди. Хар  къонакъ юй да  туристлени алыуну жорукъларын, излемлерин да кеси тохташдыргъанды. Аны себепли  кёпле  кеси къыралыбызда солургъа, Къара тенгизни бойнуна барыргъа сюйгендиле. Алай бла ахыр эки жылда туристле  Россейни курортларында солугъандыла, – дейди Зульфия.  

Нальчикни санаторийлеринде солугъанладан да кёпле келедиле. Ала асламысында орамлада рекламаладан неда интернетден биледиле аны турфирмасыны юсюнден. Шёндюгю заманда абаданладан башлап сабийлеге дери социал сетьлени хайырланмагъан адам хазна болмаз. Ол себепден  Зульфия фирмасыны сайтын ачханды, аны атын айтдырыуну башха амалларын да хайырланады. Алай бла аны иши бла кёпле шагъырей болгъандыла. Хар келгеннге ол энчи эс бёлюп,   аланы ыразы этип ашырады. 

– Тыш къыраллагъа жолоучулукъладан сора да, Шимал Кавказда экскурсияланы да бек сорадыла, - деп чертеди ол. – Аллайланы асламысы  Нальчикни санаторийлеринде солугъанладыла. Ала мени фирмамы телефон номерин не интернетде, неда  бизни болушлугъубуз бла солуп кетген жууукъларындан, танышларындан билип келедиле. Сёз ючюн, кёп болмай  мында юйюрю бла солугъан бир эр киши телефон номеригизни интернетден  тапханма дегенди. Шимал Кавказда экскурсиялагъа барыргъа сюйгенле шёндю бек кёпдюле. Къуру тышындан келгенле угъай, бизни республикабызда жашагъанла да тамашалыкъ табийгъат жерлерибизге жолоучулукълагъа  барыргъа сюедиле.

Пандемияны заманында тыш къыраллагъа чыгъаргъа къыйыныракъ болгъаны себепли кеси республикабызны ичинде да кёп тюрлю экскурсияла къуралады. Тенгиз болмагъанлыкъгъа, къарар эм солур жерлерибиз кёпдю. Ол себепден Къабарты-Малкъарда да аллай жолоучулукъланы кёбейтиу эм жангы маршрутла ачыу да бек магъаналыды. 

– Бизге келген къонакъла Элбрусну, Чирик кёллени, Чегем  чучхурланы  эмда къоншу республикалада солууну терк-терк соргъанлай турадыла. Быйыл экскурсиялагъа бла жолоучулукълагъа сурам мындан алгъа эки-юч  жылдан эсе кёп болгъанды. Алай аланы жумушларын жалчытыуну игилендириу жаны бла алыкъа кёп иш этерге керекди, – дейди ушакъ нёгерибиз. 

Зульфия адамланы солууларын тынгылы къурар ючюн къолундан келгенни аямайды. Сынам жыйышдырыр, адамланы солургъа къайры ашыргъанын кёрюр ючюн, ол къонакъ юйлеге кеси барып сынайды. Шёндю уа Къыбыла Европаны талай шахарын жокълар умуту барды. 

Гуппойланы Зульфия учунуулугъу бла жаш тёлюге юлгюдю. Не тюрлю болумда да, къолларын бошлап къоймайды, къуруда алгъа итинеди. Муратынга жетер ючюн жолунгда тюбеген чурумладан къачмай, элгенмей, алгъа таукел барыргъа, деген жорукъ бла жашайды.   

 

Холамханланы Алима.
Поделиться: