Къыйынына – бийик багъа

Къайгъырмазланы Арсен Москваны педагогика къырал университетинде ишлегенли 5 жылдан артыкъ болады. Бийик билим берген окъуу юйде ол «Маяк»  проектни жашауда бардыргъанладан бириди. Кеси  айтханнга кёре, аны чеклеринде ала студентлени  Ату журтну сюерге, анга кертичи болургъа  юйретедие. 

– Бюгюнлюкде «Маяк» Москвадан башха  шахарлада да кюч ала  барады. Шёндюгю жаш адамлагъа биз тарыхыбызны болумуча ангылатыргъа борчлубуз. Сёз ючюн, Уллу Ата журт урушну юсюнден кёп тюрлю хапарла жюрюйдюле бюгюнлюкде. Ким хорлагъанын, ким хорлатханын бир-бирле кеслерине таплыкъда жазып басмалайдыла. Биз а совет халкъла ол хорламгъа къаллай уллу къыйын салгъанларын ангылатыргъа керекбиз.

 Бизни вуз дагъыда «Без срока давности»  федерал проектни бардырыугъа да тири къатышады. Бу проект немисли ууучлаучула совет халкъгъа жетдирген къыйынлыкъны юсюнденди. Студентлерибиз школлагъа жюрюйдюле, окъуучуланы араларында жарыкъландырыу ишни бардырадыла. Андан сора да, тюрлю-тюрлю форумла да ётдюребиз, – деп чертгенди Къайгъырмаз улу.

Озгъан ыйыкъда уа РФ-ни жарыкъландырыу министри Сергей Кравцов, Къайгъырмазланы  Арсенни жашы тёлюню арасында патриот сезимни кенг жайыугъа этген къошумчулугъуна бийик багъа бичип, ведомствону Сыйлы грамотасы бла саугъалагъанды. 

Таппасханланы Аминат.
Поделиться: