Туризмни айнытыугъа – алты миллиард сом

Гитче шахарлада туризмни айнытыугъа болушлукъ этиуню чегинде 24 регионнга 6 миллиарддан аслам ахча берилликди. Аны мураты туристлени  бай эм сейир тарыхлары болгъан алай аз адам жашагъан жерлени кёрюрге сейирлерин къозгъауду. 

РФ-ни Правительствосуну башчысы Михаил Мишустин айтханыча, бу ахчагъа бир архитектура – маданият майданны къураргъа, туристле сюйген жерлени айбатландырыргъа, адамлагъа тынчлыкъгъа навигация системаны жарашдырыргъа боллукъду. «Иш барды, кеси да кёпдю. Бу мадарла барысы да белгиленнген жерледе жашагъан адамланы кеслерине, алагъа жолоучула сюйюп келирлерине эм алагъа тынчлыкълы онгла къураугъа себеплик этерикдиле», - дегенди ол.

Андан сора да, регионла турист бизнесге грант болушлукъ этерге 5 миллиарддан аслам сом аллыкъдыла: аны 3 миллиарды – жамауат башламчылыкъланы толтуруугъа эм турист маршрутланы бла солуу жерлени тапландырыугъа бёлюнюрюкдю; 700 миллиону – кемпинглени бла автокемпинглени ишлеуге; 1,5 миллиарды да – турист инфраструктураны жангыртыугъа. 638 миллионну правительство 36 регионнга туристлени аслам келиулерине себеплик этген мероприятияланы – фестивальланы, байрамланы, спорт эришиулени – къураугъа жиберликди. Правительствону башчысы аллай мероприятияланы юслеринден жамауатха билдирирге кереклисин да чертгенди. Ол оюм этгенден, быллай башламчылыкъ къыралны ичинде туризмни айнытыугъа, анга адамланы жанындан сурамны жангызда школ каникулланы неда жайны кезиуюнде угъай, башха кезиуде  да ёсдюрюрге болушурукъду, деп билдиредиле республиканы Курортла эм туризм министерствосундан.