Къолдан уста футболчу

Мени бюгюннгю жигитим Аппайланы Заур туугъан элинде сыйы жюрюген жашладан бириди. Ол а кёпню тутады. Бюгюнлюкде кеси да Тёбен Чегемни жер-жерли самоуправлениясыны депутатыды, жаш тёлюге хаман эс бёлгенлей тургъанладан бириди. Дагъыда Заур къолдан усталыгъы бла да белгилиди. Кеси гюрбежи къурап, таулу бичакъла ишлейди. Алагъа къачан да сурам уллуду. Битеу бу мен башда санагъан затла чегемли жашха зауукълукъ келтиредиле. Аппай улуну оюмуна кёре, адам жаланда эте билген заты бла кюреширге керекди. Башлагъан жумушу бармагъанын кёре эсе уа, ол жерни бош этерге борчлуду. Не къуллукъда, не ишде тура эсе да…

Мени ушакъ нёгерим бухгалтер-юристге окъугъан эди. Алай окъууун бошагъандан сора туугъан элинден тышында жаланда бир жыл ишлегенди. Чегемде орналгъан заводланы биринде Заур французлу наладчикле бла танышхан эди. Ала таулу жашны халин, иш кёллюлюгюн кёрюп, биргелерине да кёп кере чакъыргъандыла. Алай ол туугъан элинден тышында жашау этерге хазыр тюйюл эди.

- Тауларыбызгъа жетген жокъду. Жашла тенгизге барайыкъ деп кюрешселе да, тауларыбыз таба айланып къачханма къачан да, - деп кюледи Аппай улу.

Бюгюнлюкде Заур элли жаш тёлю орамда бошдан айланмазча этип, футболдан секция  ачханды. Ол Чегем районну спорт школуну тренерлеринден бириди.

- Кесим школда окъугъа заманымда эм андан сора да спортну б у тюрлюсю бла кёп кюрешгенме. Эллилерибизни абадан тёлюсю Сарбашланы Альберт, Керекмезланы Саид  бизни да юйретип, бек иги ойнаучу эдиле. Бир кезиуде мени да чакъыргъан эдиле нальчикчи «Спартакны»   жаш тёлю къауумуна. Бармай къалгъан эдим, - деп эсгереди.

Бюгюнлюкде ол къурагъан къауумгъа къыркъдан аслам жаш жазылыпдыла. Жарсыугъа, бир ызгъа ала барысы да жыйылалмайдыла, тюрлю-тюрлю сылтаула бла байламлы. Алай команданы жарымындан асламы уа келеди. Футбол майдан элни къыйырында Чегем сууну жагъасындады. Жашла анда жарау этип тебирегенли жыл толмагъанды. Бу кюнледе уа элде гитче футбол майдан ачылгъанды да, энди бир кесек тынчыракъ боллукъду.

- Майдан бир кесек чунгурлу эди. Ол себепден жашла аякъ тюплерине къарап ойнаргъа юйреннгендиле. Энди сыйдам объектде энишге къарамай, алларына къараргъа юйретсем, борчуму толтургъаннга санарыкъма. Кёп болмай эл администрация, жашла да болушуп, команданы кийимле бла да жалчытхандыла. Бек къууаннганбыз. Сау болсунла. Спорт школда артыкъ ийнаннган да этмей эдиле жаш тёлюню жыяллыгъыма. Алай 40-дан аслам жыйлгъанын кёргенлеринден сора сейирге окъуна къалгъандыла. Жууукъ кезиуде эришиулеге къатышып тебирербиз деп муратлыма, - дейди ушакъ нёгерим.

 Башда айтханымча, Аппай улу кеси гюрбежи къурап, таулу бичакъла да ишлейди. Бюгюнлюкде Заурну бичакъларына сурам уллуду. Нек дегенде ол алагъа багъа айтмайды. Ишлеген темирин сайлаугъа  жууаплы кёзден къарайды. Бу иш бла не себепден кюрешип башлагъанын соргъанымда, уста былай айтханды:

- Бир жол малны боюнун тартып, сой деп тилейдиле. Барама. Берген бичакъларыны жуху бюгюлюп кетип, ол кюн бек къыйналама. Сора анга эс бёлюрге кереклисин ангылап, этип кёрюрге таукел болама. Кёп тюрлю темирден жарашдырып да кёргенме. Бюгюнлюкде тохташхан тюрлюню жаратып, аны хайырланама. Мени оюмума кёре, адамгъа жашауда хайырланыргъа тюшген бичакълагъа уллу багъа бичиу иги тюйюлдю. Хау, омакълыкъгъа деп жарашдырсала, ангыларгъа боллукъма. Бир къауум заман мындан алгъа айтхылыкъ устабыз Бачиланы Хамзат да чакъыргъан эди усталыкъны жашырынларына юйретирге. Бек ыразыма. Мен сагъыш этгенден, адам хар неге да тынч-тынч юйренирге керекди. Кемчилиги неде болгъанын ангыларгъа, билирге.

Бичакъларыны сапларын Заур асламында агъачдан ишлейди. Бютюнда терекледе ёсген «губузладан». Аланы жарашдырыуну да кесини технологиясы барды. Дагъыда мюйюзлени бла ууакъ малны туякъларын да хайырланады. Была барысы да къатып, бичакъ сапха жарарча болгъунчу да заман керек болады.

Заур эллилерине мал союп жарашдырыуда да болушады. Адамгъа болушлукъ этиу,онг тапдырыу мени жигитими аш шартларындан бириди. Ол кеси да аллай затлагъа энчи магъана береди.