Эрттеден сакъланнган сабий сад

Кёп болмай Жангы Малкъарда «Демография» миллет проектге кёре алтмыш сабийге садик ишлеп башлагъанды. Ол эрттеден бери сакъланнган социал мекямладан бири болгъанын да белгилерчады.  

Алгъын ол элни мектебинде орналгъанды эм жангы излемелеге артыкъ келишмегенди. Энди уа  уллулугъу  868,3 квадрат метрге жетген, бир къатлы мекям  жангы билим бериу стандартлагъа толу келишеди. 

Сабийлеге  тап болурча эм ала  тюрлю-тюрлю жаны бла айнырча онгла да къуралгъандыла. Мекямны уллу холу,  физкультура залы,  ашханасы, медицина кабинети, быстыр, къол-бет  жуугъан жерлери да бардыла. Бюгюннгю оборудование бла да  жалчытылыннганды. Жылыу бла  бир тюрлю сылтау чыкъмазча аны кесини энчи котельнасы  барды. Арбазы да айбатлыды эм къоркъуусузду.    Ол санда  ойнагъан, физкультурадан жараула ётдюрген майданлары да барды.  

Бусагъатда эллиден артыкъ гитче келеди.

Сабий сад элге кирген жерде орналады эм омакълыгъы бла  кёзню къууандырады. Элни администрациясында айтханларына кёре, муниципалитет кеси ахчасына жангы объектге  эки холодильник бла бир быстыр жуугъан машина  алып бергенди.