Адамланы алдап байыкъланнганланы мюлклери сыйырыллыкъды

РФ-ни Уголовный кодексине тюзетиуле биринчи окъулууда къабыл кёрюлгендиле. Алада сёз компьютер информация сферада аманлыкъла этгенлени мюлклерин сыйырыргъа эркинликни юсюнден барады.

Тюрлениуле РФ-ни УК-сыны 104.1-чи статьясына хазырланнгандыла.   Компьютерде болгъан шартланы урлагъанда, заранлы программаланы хайырланнганда, аланы жарашдыргъанда, РФ-ни информация инфраструктурасына хата салгъанда аманлыкъчылагъа тюшген мюлкню сыйырыргъа кереклисин белгилейдиле законну авторлары.

- Хыйлачыла жангы технологиялагъа юйреннгендиле, кредит-финанс сферада аманлыкъланы саны кюнден-кюннге кёбеедиле. Алдап, неда заранлы программаланы хайырланып, инсанларыбызны банк карталарындан ахча урлаула неда аланы атларына кредитле алыу кезиуле артыкъда асламдыла. Аманлыкъчыланы ишлеринден тамата тёлюню келечилери бютюнда ачыйдыла. Банклагъа, предприятиялагъа уллу къоранчла салынадыла,- дегенди РФ-ни Къырал Думасыны къоркъуусузлукъ эм коррупциягъа къажау комитетини башчысы   Василий Пискарев.

Законопроектни ангылатыу бёлюмюнде жазылгъаныча, РФ-ни МВД-сыны шартларына кёре, къыралда хар тёртюнчю аманлыкъ информация-коммуникация технологияланы болушлукълары бла этиледи: интернетни, мобильный телефонланы, компьютерлени, энчи программаланы хайырланып.  Быллай бузукълукъланы саны жылдан-жылгъа ёседи. Юлгюге, 2021 жылда компьютер информация сферада 6,3 мингден аслам аманлыкъ этилгенди, ол а 2020 жылны тарихлеринден 62,5 процентге асламды.

- Информация технологияла сферада аманлыкъла этгенлени мюлклери сыйырылып башласа, жамауатда тюзлюк тохташдырыллыкъды. Ахча  уа ачыгъанланы къоранчларын къайтарыргъа берилликди,-деп ангылатханды Василий Пискарев.