Солуугъа бюгюнден окъуна хазырланыгъыз

Сау жылны къадалып ишлеген адам солуу кезиуню зауукълу ётдюрюрге сюеди. Алай анга къоранчла   уллудан,   юйюрню къолайлыгъына хата тюшмей къоймайдыла. Алай болмаз ючюн а солуу кезиуге иги хазырланыргъа керекди. Бу статьяда  финанс экспертлени   юйретиулери бла шагъырей этерге сюебиз.

 Къоранчланы терге

Бек алгъа къайсы айда солуругъуну шарт тохташдырыргъа керекди. Ол а ахчаны жыйыуну мадарларын белгилегенде магъаналыды.  Айлыкъ 40 мингнге жетгенде, эки айны ичинде солуугъа 300 минг сом жыйылмазлыгъы баямды.   

Экинчи атлам: солуугъа   ненча ахча керек болгъанын  тергерге тийишлиди. Бу кезиуде уа битеу къоранчланы да санаргъа керекди: жолгъа, къонакъ юйде турургъа, ашха, суугъа, экскурсиягъа, жууукълагъа саугъалагъа…  Тизме этип, андан тышына чыкъмазгъа кюрешигиз. Аны бла бирге уа багъала тюрленнгенлерин эсге алып, шёндюгю тарихлеге бек аздан 20 процентни къошугъуз. Солуудан сора артыкъ  ахча къалса  ким  да къууанырыкъды, жетмей, керексиз къоранчла этерге тюшгенден эсе. 

 Айлыкъны ая

Солуу кезиуге дери ненча заман къалгъанын, къоранчланы ёлчеми ачыкълагъандан сора, ахчаны жыйып башларгъа боллукъду. Отпускга керекли ахчаны анга дери къалгъан айлагъа юлешебиз. Сёзге, жыл жарымдан солургъа мурат этип, анга 60 минг сом кереклисин санагъан эсегиз, ай сайын 10 минг сомну бир жанына салыргъа керекди.  

Алай бу ахчаны да акъыл этип жыяргъа боллукъду. Сёзге,  борчну къайтарсала неда премия тёлеселе, аны да солууну бохчасына салыгъыз. Тюкенде бир сейир затны кёрюп, алай аны сатып алыудан кесигизни тыялсагъыз, аны да ары къошугъуз. Айлыкъ тёленнген кюн счётугъузда башха хакъдан жукъ къалгъан эсе, аны  да солуу бохчагъа ашырыгъыз.

Ахчаны жыяр ючюн къоранчланы азайтыргъа кереклиси баямды. Хау, сюйген, кюсеген затынгы алмай къойгъан къыйынды. Алай бу къоранчланы азайтыуну мадарлары да бардыла. Артыкъ жашау магъаналы болмагъан къоранчланы тизмесин къурагъыз. «Ансыз ахырда  боллалыкъ  тюйюлме» деген затлагъа тиймегиз. Аланы арасына тюшмегенни уа арт болжалгъа салыргъа, ахчаны а солууну бохчасына ётдюрюрге боллукъду.

Дагъыда ичги затла, тютюн, татлы суула саулукъгъа заран салгъанларын ангылап, аланы алмагъыз.  Бу къоранчланы ёлчеми уа аз тюйюлдю.

Къошакъ файда

Дагъыда къошакъ файда алыргъа онг барды.  Сёзге, социальный сетьледе къысха заманнга иш керек болгъанын эмда къаллай жумушла толтура билгенигизни басмалагъыз. Ким биледи, сизни усталыгъыгъыз башхалагъа керек эсе уа.

 Керек болмагъан, эрттеден хайырланмагъан затланы сатаргъа, алай бла уа солуугъа энтта ахча къошаргъа да боллукъду:  эски техниканы, журналланы, конькилени, алача башха затланы. Къошакъ ахча бла бирге юйню керексиз затладан тазаларыкъсыз.

Алай бла, хурметли окъуучуларыбыз, быйыл солуугъа бюгюнден окъуна хазырланып башлагъыз. Биз а ол зауукълу ётерин тежейбиз.

Басмагъа Тикаланы Фатима хазырлагъанды.
Поделиться: