Наркотикле бла тутулгъанды

МВД-ны Нальчикде Управлениясыны участковыйи Мальбахов атлы орамда кесин къужур жюрютген жаш адамгъа эс бургъанды. Аны документлерин тинтгенде ол адам 31-жыллыкъ тыш къыраллы болгъаны тохташдырылгъанды. Сорууну кезиуюнде жаш сумкасында наркотикле болгъанларын билдиргенди. Алайгъа чакъырылгъан оператив-следствие къауум ол адамда 100 къара чулгъам табып сыйыргъанды. Андан сора да, сумкасында кёк тюрсюнлю хуржун тапхандыла. Аны ичинде уа порошок вещество, электрон базман эм тюрсюнлю изолентала бар эдиле. 

Аманлыкъчы ангылатханнга кёре, уулу затны ол Нальчикни тийресинде букъдурулгъан жерден алып, андан ары законсуз сатыу-алыу бла кюрешир умуту бар эди.

Экспертизагъа кёре, сыйырылгъан зат 88,45 грамм тартхан «героин» эди.

МВД-ны Нальчикде Управлениясыны 2-чи номерли бёлюмюнде эр кишиге РФ-ни Уголовный кодексини 228.1-чи статьясыны 4-чю кесеги бла (законсуз уулу затланы сатыу-алыу) ючюн уголовный иш ачылгъанды, деп билдиредиле КъМР-де МВД-ны пресс-службасындан.

Холамханланы Алима.
Поделиться: