Окъуу юйде – къоркъуусузлукъну кюню

Къабарты-Малкъарны болушлукъгъа терк келген службаларыны келечилери КъМКъУ-ну медицина колледжинде къоркъуусузлукъну кюнюн ётдюргендиле.

Студентле ДТП-ны сылтауларын тинтип, биринчи болушлукъ берирге юйреннгендиле.

Специалистле бла бирге студетлеге МВД-да къуралгъан жамауат советни келечиси Руслан Макушев эм Нальчикни жер жерли самоуправление советни таматасыны орунбасары Мулид Макоев келгендиле.

КъМР-де МВД-ны къырал автоинспекциясыны къуллукъчусу, майор Алла Моторова жолда осал болумланы сылтауларын туура этгенди. Терк-терк болгъан аварияланы да тинтгенди. Жаш адамла жолда кеслерин къалай жюрютгенлерине энчи эс бургъанды. Автоинспекторла студентлени эслерин биринчи болушлукъ бергенде къаллай жангылычла этилгенлерине бургъандыла.

Регионда «Россейли къызыл жорну» бёлюмюню келечиси Лидия Анчёкова жаш тёлюге практика дерсле ётдюргенди.

Окъуучулагъа хатагъа тюшген адамгъа къалай къараргъа керек болгъанын кёргюзтгендиле, къанны тохтатыр ючюн не амалла этерге боллугъун да ангылатхандыла. Андан сора да, чып тюшюуню тюрлюлери бла да шагъырей этип, медицинаны болушлугъу бла адамны жанын сакълауда не амалла болгъанын тинтгендиле. 

РФ-ни МЧС-ини КъМР-де Баш управлениясыны психологу Александр Хохлачёв от тюшген заманда неда бир башха къыйын болумда адам кесин къалай жюрютюрге керек болгъанын айтханды. Ызы бла ол абызырамай, терк оноу этиуню амалларыны юслеринден билдириу этгенди.

 Жамауат эм муниципал властьланы келечилери быллай тюбешиулени бардырыуну магъанасы уллу болгъанын чертгендиле. Нек дегенде медикле алада кёп жангы затла биледиле. Ол а алагъа ишге тохташханда хайырлы боллукъду.

- Студентле бла тюбешиуюбюз биз умут этгенча хайырлы ётгенди, деп айталлыкъма. Аны кезиуюнде жаш адамлагъа къыйын болумлада тюз амал таба билиуню амалларын ангылатыр онгубуз болгъанды, – дегенди РФ-ни МЧС-ини КъМР-де Баш управлениясыны пресс-секретары Кантемир Беров.