Магъаналы жолоучулукъ

Уллу Ата журт урушда Сталинградны эркинлиги ючюн къазауатны 80-жыллыгъына атап, РФ-ни ФСБ-сыны КъМР-де Чекчи управлениясы кадет классланы окъуучуларына патриот дерсле къурагъандыла. Аны юсюнден бизге ведомствону пресс-службасындан билдиргендиле. 

Чекчиле окъуучуланы Управлениягъа чакъырып, аны болуму бла шагъырей этгендиле. Кадетле Ата журтну къоруулаучуларыны эсгертмесинде болгъандыла – анда ИС-3 танк салыныпды.  Дагъыда ала аскер махтаулукъну музейине да баргъандыла. Анда уа Уллу Ата журт урушну тарыхыны юсюнден кёрмюч къуралыпды. Окъуучулагъа совет аскерчилени жигитликлерини, Сталинград ючюн къазауатны тарыхыны юслеринден айтхандыла. Ызы бла уа алагъа «Сталинград» деген документли фильмни кёргюзтгендиле. Ахырында кадетле бла тарых викторина къуралгъанды. 

Тюбешиу ведомствону ветеран организацияларыны, Управленияны къуллукъчуларыны, «Боевое братство» жамауат организацияны башламчылыкълары бла эмда Тырныауузда Совет Союзну Жигити В.Кузнецов атлы школну болушлугъу бла къуралгъанды.