Маданият юйлени жангыртыу, чыгъармачы проектлеге себеплик этиу да андан ары бардырыллыкъды

КъМР-ни Башчысы Казбек Коков РФ-ни Правительствосуну Председателини орунбасары Татьяна Голикова бардыргъан кенгешге къатышханды. Анда сёз «Маданият» миллет проект 2022 жылда къалай толтурулгъанына къаралгъанды эмда 2023 жылгъа борчла салыннгандыла.

Къабарты-Малкъарда «Маданият» миллет проектни жашауда бардырыугъа былтыр федерал бюджетден 351 миллион сом бёлюннгенди, регион бюджетден да 90 миллион сом къошулгъанды. Ол ахчагъа «Маданият болум» эмда «Хунерли адамла» деген проектлеге кёре ишле тамамланнгандыла. Ол санда Дыгулыбгейде, Ташлы-Талада, Александровскаяда, Камлюковода, Урванда маданият юйле жангыртылгъандыла. Озрекде маданият юйге былтыр башланнган ремонтну быйыл бошаргъа белгиленеди.

Андан сора да, Нальчике  Маданият жаны бла айныуну арасы ишленирикди. Ол 1,5 минг квадрат метрден артыкъ жерни аллыкъды. Жаш къараучуну театры да ремонтдан сора эшиклерин ачханды.  Нальчикде бла Анзорейде искусстволаны сабий школлары тапландырылгъандыла, Прохладныйде аллай школда ремонт ишле башланнгандыла. Аны бла бирге искусстволаны школларын музыкалы инструментле бла жалчытыу, муниципал китапханаланы бла музейлени игилендириу ишле барадыла.

Сабийлени  окъутууда маданият жаны бла жангы амалла бла стандартла сингдириледиле. Чыгъармачы усталыкълары болгъанланы билимлерин ёсдюрюу жаны бла иш бардырылады, жетишимлеге кёллендириуню амаллары да сингдириледиле. Элледе бек иги ишлеген маданият юйлеге бла аланы коллективлерине субсидияла жыл сайын бёлюнедиле. Жыр-тепсеу къауумлагъа бла НКО-ну чыгъармачы проектлерине да ахча болушлукъ этиледи.

2019 жылдан бери республикада маданият ишлеге къатышханланы саны юч кереге ёсгенди. Ол а маданият учреждениялада чыгъармачылыкъ жаны бла айныргъа ахшы онгла къуралгъаны ючюн болгъанды. Маданият учрежденияланы саны бюгюнлюкде  364-ге жетгенди. Ол тизмеге театрла, музейле, китапханала, искусстволаны сабий школлары, маданият юйле бла  концерт майданла киредиле.

«Маданият» миллет проектге кёре быйыл дагъыда Терекскоеде, Приближнаяда бла Исламейде маданият юйлеге тынгылы ремонт этерге, Нальчикде суратлау школну жангыртыргъа белгиленеди. Маданият учрежденияланы ишлерин игилендириу, чыгъармачы проектлеге себеплик этиу да андан ары бардырыллыкъды, деп билдиргендиле КъМР-ни Башчысыны бла Правительствосуну пресс-службасындан.