Казбек Коков энчи аскер операциягъа къатышханлагъа тутхучлулукъ этгенлеге жюрек ыразылыгъын билдиргенди

Энчи аскер операция бла байламлы республиканы Башчысыны буйругъу бла 2022 жылны март айында къуралгъан  ишчи къауум ишини эсеплерин туура этгенди. Алагъа кёре аскерчилеге болушлукъгъа бюджетден, андан тышындан да ахча бёлюнеди. КъМР-ни Правительствосуну Къыстырыкъ фондундан мобилизациягъа тюшгенлени кереклерине 40 миллион сом берилгенди. Кийимледен бла техника керекледен да къыстырыкъ этилгенди, анга дайым къошулуп турады.

Гуманитар жюкле энчи аскер операция баргъан жерлеге аскер башчыла тохташдыргъан низамгъа кёре жибериледиле. Октябрьден бери 100 тоннадан аслам ётдюрюлгенди. «Жангы бийикликле» аскер-патриот фондну эмда «Артха бир атлам да этмезге» регион жамауат биригиуню себепликлери бла юйюрледен посылкаланы, школчуладан да письмоланы ыйыкъ сайын бизни аскерчилерибиз тургъан жерлеге жибериу къуралгъанды. Андан сора да, КъМР-ни Башчысыны былтыр декабрьде къол салыннган Указы бла социал болушлукъну ёлчеми тергелген заманда, мобилизациягъа тюшгенлеге ай сайын тёленнген ахча эсге алынмайды. Андан сора да, аскерге чакъырылгъанла, аланы юйюрлерини адамлары да жашау журтла эмда коммунал жумушла, дагъыда тынгылы ремонт ючюн хакъны заманында тёлеялмасала да, аланы ёлчемлерине къошулмайды. Юйюрлерине да керек болса, жашагъан жерлерине ремонт этиу, аш-азыкъ эмда кийимле бла да болушлукъ тапдырылады.

Аллай къауумгъа киргенле сабий садха  хакъ тёлеуден эркин этиледиле. Аланы сабийлери исси аш-азыкъ бла хакъсыз жалчытылынадыла, керек болгъанда, ала санаторийге да бек алгъа жибериледиле. Мобилизациягъа тюшгенлени юйюрлери суу эмда кир-кипчик ючюн хакъ тёлерге керек тюйюлдюле.  Ара рынокда гуманитар болушлукъ жыйыу жаны бла энчи пункт ачылгъанды. Аскерчилерибизни жигитликлерини, жандауурлукъ ишлени юслеринден халкъгъа дайым билдирилип турууну тап къурар ючюн басма органлада «Хар нени да хорламгъа», «Биз биргебиз» деген рубрикала ачылгъандыла.  Мобилизациягъа кёре аскерге чакъырылгъанла бла телевизорну хайыры бла байламлыкъла къураргъа хазырланыу барады. Проект Президентни буйругъу бла къуралгъан ишчи къауумну себеплиги бла бардырылады.

Республиканы Башчысы аскерчилеге деп хазырланнган кезиулю гуманитар жюкню керекли жерге не къадар терк ётдюрюуню къураргъа буюргъанды. Энчи аскер операциягъа къатышханлагъа тутхучлулукъ этиуге къошулгъанланы барысына да жюрек ыразылыгъын билдиргенди.  «Бюгюнлюкде ала бек магъаналы ишни тындыргъанларын ангыларгъа керекбиз»,-деп чертгенди ол кезиулю кенгешде.