Медиклеге – иги тутхучлулукъ

РФ-ни Президенти Владимир Путинни буйругъу бла эмда РФ-ни Правительствосуну «Саулукъ сакълауну къырал эмда муниципал  системасына кирген эмда борчлу халда медицина страхованияны  баш программасына неда борчлу халда медицина страхованияны жер-жерли программаларына къатышхан медицина организациялада ишлеген медиклени къошакъ халда къырал социал болушлукъ бериуню юсюнден» 2022 жылны 31 декабринде чыгъарылгъан бегимине тийишлиликде быйыл 1 январьдан башлап медиклени 11 къауумуна энчи социал тёлеуле тохташдырылгъандыла.

Къабарты-Малкъарда федерал бюджетден къошакъ социал болушлукъну 6269 медик аллыкъды. Бу жумушха 671 миллион сом бёлюннгенди. Субъектлеге  регион бюджетледен ахча бёлюп, бу бегимге кёре къошакъ социал тёлеуге тийишли болгъанланы санын кёбейтирге боллукълары айтылгъанды. КъМР-ни Башчысыны буйругъу бла къошакъ социал тёлеулеге тийишли болгъанланы регион тизмесине ара район больницалада, поликлиникалада, онкология диспансерде ишлегенлени бир къаууму кирликдиле. Алай медицина билимлери болмагъанла (биологла, лаборантла), терк болушлукъ берген службаны водительлери, санитаркала да бир жанында къаллыкъ тюйюлдюле.

Республикалы бюджетден эки минг медикге социал тёлеулеге битеу да 90 миллион сом чакълы бир бёлюнюрюкдю. Къошакъ ахчаны саулай да 8 мингнге жууукъ адам аллыкъды. Казбек Коков регион тёлеулени федеральныйле бла бирге берип башларгъа буюргъанды.