Спортчулагъа – танг себеплик

КъМР-ни  Башчысы спортчулагъа алчы жерлеге чыкъгъанлары ючюн тёленнген ахча саугъаланы ёлчемлерин эки кереге кёбейтиуню юсюнден Указгъа къол салгъанды. Сёз спортну Олимпиадалы эмда Олимпиадалы болмагъан, паралимпиадалы эмда сурдлимпиадалы тюрлюлерине кёре Россейни жыйымдыкъ командаларыны баш, жаш тёлю эмда юниор къауумларына кирген спортчуланы эмда аланы тренерлерини юслеринден барады.

Ахча саугъаланы ёлчемлери эришиулени даражаларына эмда спортчу къайсы жерни алгъанына кёре  40 мингден  2 миллион сомгъа дери жетедиле. Ислам Хасанов айтханнга кёре, алгъын спортну бир-бир тюрлюлерине кёре юниор эмда жаш тёлю къауумлагъа киргенлеге ахча саугъала  тёленмегендиле. «Алай бла биз спортда жетишимле болдургъанлары ючюн саугъагъа тийишли болгъанланы тизмесин кенгертебиз, алагъа тёленирик ахчаны да эки кереге кёбейтебиз»», - дегенди Казбек Коков кезиулю кенгешде.