Мардасыз ишчи заман къаллай кезиуде кийириледи

Урунуу кодексге тийишлиликде, ыйыкъны ичинде ишчи заман 40 сагъатдан озмазгъа керекди: 5-кюнню ичинде 8 сагъат. Алай бир-бир къауумлагъа аны ёлчеми андан да къысхады. Биринчиден, 16 жыллары толмагъан акъылбалыкъ болмагъанланы 24 сагъатдан артыкъ ишлетирге жарамайды. 16-18-жыллыкъланы ишчи ыйыкълары уа 35 сагъатдан кёп болмагъаны жазылыпды законлада. Сакъатлыкъны 1-чи эм 2-чи къаууму тохташдырылгъанланы ишчи ыйыкълары да 35 сагъатдан озмайды. Аладан сора да,   урунуу болумла саулукъгъа къоркъуулу болгъанлары тохташдырылгъан кезиуде да урунуу заман къысхартылады.

Болсада законлада мардаланмагъан ишчи заман деген ангылам барды. Ол РФ-ни Урунуу кодексини 97-чи статьясында белгиленипди.

Урунуу борчланы тохташдырылгъан заманны ичинде тамамларгъа онг болмагъан кезиуде мардасыз ишчи низам кийирилирге боллукъду. Аллай усталыкъланы тизмеси законлада белгиленипди.  Мардасыз низамгъа кёре ишлерге кереклисини юсюнден   иш бериучю буйрукъ жазады.  

Мардасыз ишчи низамгъа кёре уруннган инсаннга хакъ тёленнген къошакъ солуу заман бериледи. Аны къачан алыргъа, ненча кюн солургъа боллугъун иш бериучу урунуу келишимде неда предприятияны ичинде урунуу бегимде тохташдырады. Бу излем РФ-ни Урунуу кодексини 119-чу статьясыны 1-чи кесегинде жазылыпды. Къошакъ солуу кезиу юч кюнден аз болмазгъа керекди. Иш бериучю аны бермей къояргъа эркин тюйюлдю.

Инсан энчи буйругъу болмай, урунуу борчларын ишчи замандан сора толтурса, ол мардасыз ишлегеннген саналмагъанын айтырчады.