Белгили артистден – огъурлу сёзле

ЛДПР битеуроссей политика партияны Черек районда координатору Газаланы Масхут алгъаракълада, шуёхларындан бири чакъырып,  Краснодарда болгъанды. Шахарны эм ариу къонакъ юйлеринден биринде ол шуёху бла бирге  белгили поэт, жырчы эмда композитор Вячеслав Малежик бла тюбешгендиле. 

«Бизни тауча сёлеше тургъаныбызны эшитип, аты кенг  белгили артист къатыбызгъа келип, танышыргъа сюйгенин айтады. Биз Къабарты-Малкъардан, Нальчик шахардан келгенибизни  билгенден сора уа, Вячеслав Малежик ышарып, мындан бир талай жыл бизни аламат  республикабызгъа келирге насыбы тутханын, ариу шахарыбызны орамлары бла жаяу айланнганын, анга  къайда да  огъурлу, ишни сюйген, къонакъбайлы адамла тюбегенлерин да уллу  сюймеклик  бла эсгергенди. КъМР-ни ара шахарында болгъан кюнлери аны эсинде ёмюрге къалгъандыла»,– деп хапарлайды Газаланы Масхут.

Бир ненча жыл мындан алгъа Вячеслав Малежикни саулугъу осалгъа кетип, чыгъармачылыкъ иш бла кюрешгенин да  къоюп, телевидениягъа чыкъмай тургъанды. Энди саулугъу игиге айланнганды. Бусагъатда  уа аны ара телевиденияны бериулеринде кёрюрге, жангы жырларын эшитирге да боллукъду.

– Ушакъ эте келгенибизде, Вячеслав Малежик   юй бийчеси бла Кисловодскде санаторийледен биринде солургъа, саулугъун да  кючлендирирге бара туруп, Краснодарда тохтагъанын да айтханды,– деп да къошханды Газа улу.
Андан сора да,  мени ушакъ нёгерим  аты кенг белгили артистге бизни республикабызны, аны адамларын да  кёп огъурлу сёзле бла эсгергени ючюн  ыспас этип, мындан ары да чыгъармачылыкъ жолунда жетишимле, узакъ ёмюр, саулукъ да тежегенди. Бюгюн да, жаш заманларындача, аны жырларын билгенлерин, сюйгенлерин, алагъа  тынгылагъанларын да  чертип айтханды.

Бу тюбешиу эсде къалыр ючюн а ала бирге  суратха да тюшгендиле.

Суратда: солдан онгнга: Биттирланы Алим, Вячеслав Малежик, Газаланы Масхут.