Дарманланы багъаларына ким къарайды?

Жашау этгенде эм магъаналы эмда керекли дарманланы багъаларына къырал контроль этеди. Ол аланы чыгъарыучу предприятияланы багъаларына чек салады, регионлада оптовый эмда розница багъаланы мардаларын тохташдырады.

Башха дарманланы багъаларына уа къырал къарамайды. Алай отуз кюнню ичинде препарат 30 неда андан аслам процентге багъа болса, къырал структурала къошулуп, аланы тыяргъа боллукъдула, деп айтылады Объясняем.рф порталда.

Дарманны багъасы артыгъы бла кётюрюлсе, къайры барып тарыгъыргъа боллукъду? Монополиялагъа къажау службаны (ФАС), Саулукъ сакълау министерствону, Росздравнадзорну, регионланы властьларыны бу жаны бла къаллай эркинликлери бардыла? Алагъа ФАС-да бергендиле жууап.

Дарманланы жашау этгенде эм магъаналы эмда керекли тюрлюлерини тизмесине къошханда, Саулукъ сакълау министерство тийишли комиссия къурайды. ФАС бла Росздравнадзор а аллай дарманланы тизмесин жарашдыргъан комиссияны ишине къатышадыла.

Ол тизмеге кирген дарманланы багъаларын тохташдыргъанда, ФАС тинтиуле бардырады, аланы чыгъарыучу предприятияланы ол жаны бла оюмларын да сюзеди. Ала келишгенлеринден сора министерство ол багъаланы тохташдырады.

Быллай препаратланы багъаларына неллай бир къошаргъа боллугъун билирча, ФАС методика жарашдырады, регион властьланы оюмларын да тийишдиреди. Ызы бла регионлада алагъа неллай бир къошханларына кёз-къулакъ болады.

Аптекалада ол дарманланы багъаларына регион властьла контроль этедиле. Росздравнадзор да аланы кёз туурасында тутады.

Башха тюрлю препаратланы багъаларыны юсюнден айтханда, ФАС алагъа монополиялагъа къажау законланы чеклеринде кёз-къулакъ болады. Регион властьла уа Росздравнадзоргъа сёлешип, аланы мардасын тохташдырыгъыз деп тилерге боллукъдула. Ызы бла бу ведомство 30 неда андан кёп процентге багъа болгъан дарманланы тизмесин жарашдырады. Регион властьла эс бургъан тюрлюлерини багъаларына да кёз-къулакъ боладыла.

 Сагъынылгъан тизмеге кирген препаратланы багъалары кётюрюлгенин кёрсегиз, Саулукъ сакълау министерствогъа, аллай департаментге, тарифлеге контроль этген службагъа неда башха регион ведомстволагъа сёлешип билдиригиз. Аладан башха дарманланы багъаларыны юсюнден а ФАС-ха айтыргъа керекди.

Ведомстволаны сайтлары неда социал сетьледе бёлюмлери:

https://t.me/fasrussia, https://fas.gov.ru/, https://t.me/roszdravnadzor_official, https://vk.com/roszdravnadzorru. https://ok.ru/group/70000000045133, https://roszdravnadzor.gov.ru/, https://t.me/minzdrav_ru, https://vk.com/minzdravru, https://ok.ru/minzdravru, https://minzdrav.gov.ru/.