Жалгъан жандауурлукъну къалай таныргъа боллукъду?

Ахыр заманда социальный сетьледе адамны саулугъу осал болгъаны, анга багъаргъа ахча керек болгъаныны юсюнден билдириулеге терк-терк тюберге тюшеди. РФ-ни Следствие комитетини КъМР-де следствие управлениясыны къуллукъчулары жалгъан жандаруурлукъ организациялагъа   алданмауну амалларына  юйретедиле.

Керти чомарт адам этген ахшылыкълары бла махтанмайды,  ол жашырын болушады. Алай жюреги жумушакъ хыйлачыланы ётюрюклерине тюберге боллукъду. Кертиди  болушлукъ керек болгъан адамны бла ахча ючюн алдаргъа хазырланы айыргъан къыйынды. Себеплик ачыгъаннга жетмезлигине  къоркъуп, кёпле жандауурлукъ ишден кери боладыла.      

Хыйлачыла уа  адамланы чомартлыкъларына, ахшы кёллюклерине  ышанадыла.    Дагъыда инсан керти да ауругъанын бла къалгъаны тинтип кюрешгенле бек аздыла, биреуню къыйынлыгъына жарсып, анга болушургъа сюйгенлери бла да хайырланадыла бузукъчула.  Аны ючюн социальный сетьледе  билдириулеге барысына да ийнаныргъа ашыкъмагъыз. Бохчагъызны ачардан шартланы кертиликлерин тинтигиз.

 Бирде уа аманлыкъчыла социальный сетьледе бетлени бузуп, аны иеси къыйын болумгъа тюшгенини, сабийи ауругъаныны, жууугъу ёлгенини юслеринден жалгъан билдириулени басмалап, ахча кереклисин айтадыла, банк картаны тарихлерин да басмалайдыла. Окъуучуланы бютюнда ийнандырыр ючюн а ахчаны жыйыу бла жууукъ адамы кюрешгенин жазадыла.  Танышы керти да хатагъа тюшген сунуп, андан соруу бардырыргъа уялып, ахчаны ётдюрюп башлайдыла. Керти ачыкъланнганында уа  мюлкню  къайтарыргъа кеч болуп къалады.

 Следовательле быллай хыйлачылыкълагъа  тюшмез ючюн сакъ болургъа кереклисин эсгертедиле. Ахча жыйыу баргъаныны юсюнден билдириуню танышларыгъызгъа иерден алгъа шартланы кертиликлерин тинтирге керекди. Ишекли болсагъыз, ахчаны иймегиз, билдириуню танышларыгъызгъа да ашырмагъыз.

Ишекли болуу – къоркъуусузлукъну амалыды. Чомартлыкъ ишге ахчаны оюм этип, тергеп къоратыргъа тийишлиди. Кесигизни алдатмаз ючюн а   белгили,  ышаннгылы фондлагъа болушугъуз. Дагъыда быллай организацияла ахчаны орамлада жыймагъанларын билирге керекди: ала хар сом ючюн жууаплыдыла. Дагъыда  фонду сайтына къарагъыз, аны документлерин, уставын тинтигиз, адамла аны ишини  юсюнден жазгъанларын окъугъуз, организацияны юсюнден  РФ-ни Юстиция министерствону сайтында басмаланнганны сюзюгюз. Жаланда алай сакъланыргъа боллукъду хыйлачыладан – битеу шартланы тинтип, ахчаны оюм этип берсегиз.