Республика 50-жыллыгъына да жарыкъ тюбеген эди

Юбилейге хазырлана,  озгъан кезиуню сюзюп, андан эсепле чыгъарыу  тёреди. Къабарты-Малкъарны 100-жыллыгъын белгилеуню чеклеринде уа, КъМР-ни Архив службасы республика  1972 жылда кесини 50-жыллыгъын къалай белгилегенин эсге тюшюргенди.

 Бу тарых магъаналы статьяны службаны келечилери ол кезиуде басмадан чыкъгъан газетлени   мурдорунда жарашдыргъанды. Алада жазылгъаныча, битеу шахарлада бла элледе байрамны кезиуюнде халкъ къууанчла къуралгъандыла. Парклада, маданият юйледе солугъанла да кёп эдиле. «…Къабарты-Малкъарны миллетлери республиканы юбилейине эмда халкъ мюлкде жетишимле ючюн Октябрь Революцияны ордени бла саугъаланнганына жарыкъ  халда тюбегендиле…»

Анга аталып, Нальчикде «Спартак» стадионда промышленный предприятияланы кёрмючю ачылгъанды. Ол кезиуде Ленинчи комсомолну атын жюрютген ипподромда уа эл мюлкде чыгъарылгъан продукция бла шагъырейленирге онг болгъанды.  Алада кеслерини жетишимлерин   эмда усталыкъларын жюз бла жарымдан аслам фабриканы бла заводну, къурулуш эм транспорт организацияланы коллективлери кёргюзтгендиле.

«…Ипподромну кенг жеринде уа жомакълы шахар ёсгенди. Анга башхача айтыргъа жарамайды. Кёрмючню хар арбазында да республиканы эл мюлкюню жетишимлери кёргюзтюлгендиле. Анга   колхозла, совхозла, илму-излем институтла къатышхандыла…»

Ол кюн былайда дагъыда спорт эришиуле болгъан эдиле.     Аны юсюнден а журналистле былай жазгъандыла: «Эришиуле парад бла башланнгандыла. Келгенлени  аллында уа атчыла ётгендиле, аланы ызларындан жангы «Волга» машинада автогонщикле баргъандыла. Ызы бла ат чаришле башланнгандыла…».

5 сентябрьде уа Нальчикде искусствону бла спортну байрамы болгъанды. Ол Ленин атлы орамда артистлени бла спортчуланы тизгиннге сюелип баргъанларындан башланнганды. Байрам кеси уа «Спартак» стадионда болгъан эди. Анда къараучуланы аллында спортчула усталыкъларын кёргюзтгендиле, хор жырла айтханды, районладан бла шахарладан тепсеу коллективле да чыкъгъандыла сахнагъа. Ючсагъатлы байрам а фейерверк бла бошалгъанды. «Къууанчлы ишле алагъа къатышханланы бла къараучуланы эслеринде кёп  заманнга къаллыкъдыла»,-деп жазгъандыла журналистле ол къууанчланы юслеринден.   

Ма алай белгилеген эди республика  кесини 50-жыллыгъын.

Тикаланы Фатима хазырлагъанды.
Поделиться: