Жигитлиги унутулмазча

Бу кюнледе Бахсан районну Кишпек элини школунда Мурат Гошоковха   эсгертме къанга ачылгъанды. Ол Украинаны жеринде ётген энчи аскер операцияны кезиуюнде борчун толтура ёлгенди.

.Бушуулу митингге Басхан районну администрациясыны  военкоматны, жамауат организацияланы келечилери эм  тукъумдан адамла къатышхандыла.

Школну устаз коллективи юнармеецлени отряды бла бирге музыка патриот программа хазырлагъан эдиле.

Мурат Гошоков школну бошагъандан сора Узакъ Востокда чекчи аскерде къуллукъ этип тургъанды. Андан сора  Нальчик-20-да ишлеп башлагъан эди. 2016-2017 жыллада Сирияда энчи аскер операциягъа да къатышханладан бири эди. Анда «За ратную доблесть» майдалгъа тийишли болгъанды. Андан сора Чечен Республикада къуллукъ этип, Жуковну майдалы бла саугъаланнган эди. Украинада энчи аскер операциягъа биринчи кюнледен бери къатышханды. 2022 жылда 5 июльда аскер борчун толтура, Запорожьеобластьда жан бергенди. 

Россейни Президентини Буйругъу бла Мурат Гошоков Жигитликни ордени бла саугъаланнганды.          

- Биз уллу ачыу этип къарайбыз жерлешибизни эсгертме къангада суратына. Аны жигитлиги унутуллукъ тюйюлдю. Школгъа келген сабийлеге уа бу жаш адам чынтты кишиликни юлгюсю болгъанлай къаллыкъды. Ол биз сизни бла мамыр кёкню тюбюнде жашар ючюн кесин  аямагъанын унутмазгъа керекбиз! – деп чертгенди Бахсан районну администрациясыны  башчысыны биринчи орунбасары Фатимат Оганезова.

   Жыйылыугъа келгенле Муратны жылы сёзле бла эсгергендиле, ата-анасына жигит жаш ёсдюргенлери ючюн ыспас этгендиле. Ахырында бир минут шош тургъандыла, эсгертме къангагъа гюлле салгъандыла.