Алдап, иги кесек ахчаны къымгъанды

Республиканы инсаны юйюрню алдап, 550 минг сомларын урларгъа умут этгенди. Анга ачылгъан уголовный иш къабыл кёрюлюп, сюдню къараууна берилгенди.

Полицияны Зольск районда бёлюмюню следовательлери 40-жыллыкъ эр кишиге ачылгъан терслеу материалланы тинтип бошагъандыла. Ачыкъланнганыча, ишекли таныш тиширыуну юйюрю чачылыу чекге жетгени бла  хайырланып, аны алдар умут этгенди. Ол тиширыугъа сюймеклигини юсюнден айтып башлагъанды, дагъыда кесини жашаууну, къыйын болумгъа тюшгенини юслеринден сагъыныргъа да унутмагъанды.

Тиширыу  хапарлагъа  ийнанып, хыйлачыгъа ышанып башлагъанды. Эр кишиге уа  аллындан да ол керек эди. Ол биринчи 127 минг сомну ёнкючге алгъанды. Ызы бла уа    тиширыугъа саугъагъа алтын жюзюк алыргъа сюйгенин айтып,  жангылмаз ючюн анга алтынлары керек  болгъанларын айтханды. Алай бла энтта 288 минг сом багъасы алтын затланы да къолгъа этгенди.

Аны бла тохтап къалмагъанды,  тиширыуну эрин да алдагъанды.  Юйюрню сакъларгъа сюйгенча этип, саугъа ал да, аны уа мен элтирме дегенди. Юй бийченги  аллында терслигинги жулургъа сюе эсенг, багъалы телефон ал да, аны мен берирме, деп юйретгенди. Алай саугъа иесине жетмегенди.

Юч айдан а юйюр хыйлачыны ыргъагъына тюшгенин ангылагъандыла эмда право низамны сакълаучулагъа тарыкъгъандыла. Полициячыла аманлыкъчыны тутхандыла, алай урланнганны тапмагъандыла. Ол алтынланы сатып, ахчаны кеси кереклерине къоратханын айтханды.

Эр кишиге РФ-ни УК-сыны 159-чу статьясыны 2-чи эм 3-чю кеселерине кёре терслеу иш ачылгъанды.