Больничныйни тёлеуню низамы

Кёплерибиз ауругъаныбызгъа, къыйналгъаныбызгъа да къарамай, ахчаны тас этмез ючюн, ишге жюрюрге, аурууну аягъы юсюнде кётюрюрге кюрешебиз. Алай бла уа кесинги саулугъунга заран бла бирге, башхалагъа да къоркъуу салынады. Бу къысха статьяда уа больничныйни жарашдырыуну юсюнден айтыргъа сюебиз.

Закон

Больничныйде тургъанлагъа ахча тёлеу низам «Болжаллы халда ишлерге жарамагъан неда сабий тапханда борчлу халда социал страхованияны юсюнден» федерал законда эм Урунуу кодексде белгиленипди. Алагъа  кёре уа, больничный бу кезиуледе бериледи: инсан ауруса, жара тапса, санаторийде кесине бакъдырса, карантин салынса, юйюрюнде жууукъ адамы ауруса.

Тёлеуню  ёлчеми

Тёлеу  инсанны урунуу стажына эмда орталыкъ хакъына кёре тергеледи. Сёзге, стаж 5 жылдан аз эсе, тёлеуле хакъны 60 проценти тенгли боллукъдула. 5-8 жылгъа жетген кезиуде уа – айлыкъны 80 процентине жетерикди компенсация. Андан кёп эсе уа, орталыкъ хакъны ёлчеми саулай бериледи.  

Орталыкъ хакъны санагъанда уа, ахыр эки жылны ичинде битеу файда  эсге алынады. Инсан ахыр эки жылда ишлемеген  неда аны файдалары жашау этерге жетерик ахчаны эм аз ёлчемине жетмеген кезиуле да боладыла. Бу заманда уа больничный  МРОТ-ха кёре саналады.

Больничный  тёлеулени эм уллу ёлчеми да барды.  Хакъ къаллай бир болгъанына да къарамай, ол ёлчемден озаргъа жарарыкъ тюйюлдю.

Энтта бир энчилик. Адам аракъыдан, наркотикледен, алача башха затладан ууланнган эсе, анга да больничный МРОТ-ха кёре саналады.

 Болжалла

15 кюнню ичинде инсанны саулугъу игиге айланмаса, медицина комиссия жыйылып, больничныйни болжалын созаргъа боллукъду. Тинтиуле бардырылып, ол стационаргъа жатаргъа кереклиси ачыкъланса уа, больничный ол саулукъ сакълау учрежденияда тургъан кезиуге дери бериледи. Андан чыкъгъандан сора уа врач саусуз юйюнде реабилитация бардырыр ючюн энтта 10 кюнню къошаргъа боллукъду.

Инсан ауруп, больничныйде болгъан заманда аны ишден къыстаргъа эркин этилмейди.

 

Тикаланы Фатима хазырлагъанды.
Поделиться: