Буз къаланы къурулушу къыстау барады

Нальчикде «Спорт жашауну мардасы» федерал проектге кёре буз къаланы къурулушу къыстау барады.  Ол Нальчик сууну жагъасында 2-чи Тамань дивизия атлы орамда орналады.  Аны уллулугъу тёрт минг квадрат метрге жетерикди, трибуналарында юч жюзден аслам къараучугъа жер барды эм спортчуладан да жюзге жууугъу сыйынырыкъды. Мында къыш оюнланы хоккей, фигурный учуу, кёрлинг дегенча тюрлюлери бла кюреширге онг боллукъду. Аны бла бирге бузда учаргъа сюйгенлеге аллай онг табыллыкъды, керек инвентарьны мында прокатха алыргъа жарарыкъды.

 Комплекс Хужоков атлы, Осетин орамланы эм Владикавказ шоссени тийрелеринде уллу жаш тёлю спорт кластерни къурауну биринчи кесегиди. Анга шёндюгюлю футбол ойнарча майдан, баскетбол зал, велосипед жолчукъла да киредиле. Жууукъ заманда уа регбиден майдан эм сабий спорт-оюн ара да ишленирикдиле. 

Бусагъатда буз къаланы мурдорун салып бошап, къабыргъаларын тутарыкъ темир чигинжиле сюелтилинедиле эм бетон бла кючленедиле. Аны бла бирге инженер сетьле, ток чыбыкъла, таза эм кир суула баргъан быргъыла эм газ ыз да тартылгъанды. Ыза бла специалистле катокну мурдорун да жарашдырадыла. Аны къурамы къыйын болгъаны ючюн, жумушла комплекс халда этиледиле. Бусагъатда мында энчи техника бла жыйырма специалист къармашады.

Жангы спорт комплексни смета багъасы 390 миллион сомгъа жетеди. Ахча федерал эм республикалы бюджетледен бёлюнюрюкдю.

Графикге кёре объект келир жылны ахырына битерикди.