Болум къууандырады

Кёп болмай Къабарты-Малкъарны экономиканы айнытыу министри Рахайланы Борис былтыргъы жылгъа социал экономика болумну  эсеплери  бла шагъырейлендиргенди. Аны юсюнден бизге министерствону пресс-службасындан билдиргендиле.

Алай бла сагъынылгъан кезиуде къоранчланы санамай 242,0 миллиард сом багъасы продукция сатылгъанды.  Ол буруннгу жыл  бла тенглешдиргенде, 103,2 процентге кёпдю.   Ол санда эл мюлкде 110 процентге жууукъ продукция чыгъарылгъанды. Къурулушну юсюнден айтханда да 111 процент ёсюм эсленеди. Сёз ючюн, жашау журтланы  план бла белгиленнген 528 минг квадрат метри толусунлай  толтурулгъанды.
 

Жол мюлкню айнытыргъа да 3,3 миллиард сом бёлюннгенди, андан федерал бюджетге 1,7 миллиарддан аслам  сом жетеди. Аны бла бирге сатыу-алыуда да жетишимле игидиле, буруннгу жыл бла тенглешдиргенде,  ол 112,0 процентге кёбейгенди.

Туризм  бёлюмню айтханда, 1,16 миллион адам келлиги сакъланады, ол буруннгу жылдан  10,5 процентге асламды. Иш хакълагъа да  къошулурча мадар этиледи. Бюгюнлюкде республикада орта айлыкъны ёлчеми 34660 сомгъа жетеди, ол да 9,6 процентге кёпдю. Ишсиз болгъанларына эсепде тургъанланы саны 7,4 минг адамгъа жетеди, неда буруннгу жылдан 1,7 кереге аз.
Республикалы бюджетни ёлчеми 62,6 миллиард сом чакълы болгъанды. Мында да 10,7 миллиард сом тенгли бир неда 20,7 процент  къошулгъанын белгилерчады.  
Былтыр 46 чакълы регион проект бардырылырча мадар этилгенди, анга кёре ахча болушлукъ да тапдырылады. Бюгюнлюкде аны ёлчеми 1,7 кереге ёсюп,  6,5 миллиард сомгъа жетгенди эм   ахчаны 99 проценти хайырланылгъанды.
Регион проектлени чеклеринде да  къурулуш,  реконструкция, тынгылы ремонт, игилендириу эм жашау къоллу болуу жаны бла байламлы жюз объектге 9,1 миллиард сом къоратылгъанды.