Накъышла саладыла, гинжилеге жыйрыкъла тигедиле

Нальчикде сабий чыгъармачылыкъны «Кюн шахар» академиясында къызчыкъланы бла жашчыкъланы кёп тюрлю усталыкълагъа юйретген бир ненча кружок ишлейди. Аладан бири алтын, кюмюш, башха   халыла бла да накъышла салыу, гинжилеге миллет эмда шёндюгю заманны  жыйрыкъларын тигиу, къагъытладан абериле этиу бла кюрешеди.

-Бу биригиуге бир ненча къауум киреди. Алагъа хар бирине жыл санлары 10-дан башлап 16-гъа дери жетген къызчыкъладан  онбешишери жюрюйдю. Алагъа  биз, накъышла салыудан сора да, кийим бичерге, тигерге, къагъытладан, журунладан абериле къурашдырыргъа, суратла этерге да юйретебиз. Бери сабийле бек сюйюп келгенлери кёрюнюп турады,  - дейди къошакъ билим бериу жаны бла устаз Ольга Ванилова.

Улбашланы Рамета уа энчи технология жаны бла юйретиучюдю. Ол алагъа жюрюгенле  Вячеслав Зайцевни ассоциациясы жыл сайын бардыргъан «Алтын ийне» деген конкурсха къатышханларын, андан хорлам бла къайтханларын да айтханды.

- Биз быстыр тигиуню бийик даражалы школуча ишлейбиз. Битеуроссей эришиулеге да ол себепден къатышабыз. Кёп бармай «Илхамланыу» деген  конкурс боллукъду да, аны къайгъысына киргенбиз. Къызчыкъла  телефонлагъа деп миллет накъышла бла къапла, башха хуржунчукъла да этгендиле. Кими къолу бла,  кими машина бла ишлейдиле,-дегенди Рамета. 

Элина Бетуганова уа машина бла тигиу этерге юйретген устады.  Мында сохталаны хунерликлерине, башламчылыкъларына арталлыда чек салынмагъанын чертип айтады. «Къаллай накъышны  да кеслерине сайлатабыз. Ала ыйыкъгъа эки кюнню келедиле да, бир такъыйкъаларын бошуна жибермейдиле. Ма бусагъатда да къыстау кюрешедиле, конкурсха хазырлана турадыла. Ол бизни республикада бардырыллыкъды. Анда хорлагъанла уа федерал эришиулеге  къатышырыкъдыла»,-дегенди.

Устаз къызчыкъла къолгъа алгъан  ишлерине уллу кёл салгъанларын айтып,  ала  тикген эмда омакъландыргъан гинжи жыйрыкъланы, суратланы, дагъыда  къагъытладан къурашдыргъан затларын да уллу ёхтемлик бла  кёргюзтгенди.