Эл мюлкде уруннганлагъа танг себеплик этилгенди

2022 жылда Россельхозбанкны Къабарты-Малкъар Республикада бёлюмю гитче эм орта бизнес бла кюрешгенлеге, битеу да алып айтханда, 391 миллион сом ёнкюч ахча бергенди. Ол суммадан 205 миллион сом 5 процентден кёп болмагъанлай эл мюлкде уруннганлагъа льгота халда кредитле бериу Программаны чеклеринде берилгендиле.

Ёнкюч ырысхыланы алыргъа заявкала эл мюлк предприятияладан, крестьян-фермер мюлкледен эм энчи предпринимательледен келгендиле. Финанс учреждениядан алгъан ёнкюч ахчала асламысында урлукъ салгъан эм тирлик жыйгъан кезиуледе ырысхы-техника базаны хазырларгъа, техникаларына запас кереклени алыргъа, эл мюлкде хайырланнган адырланы мажарыргъа, отлукъ эм сюртюучю жаулагъа къоратыллыкъдыла.  

«Россельхозбанкны финанс болушлугъу регионда сабан ишлени тийишлисича бардырыргъа онг береди, ол амал а аш-азыкъ бла къоркъуусузлукъну жалчытыугъа жарайды. Сагъынылгъан Программаны жашауда бардырыу къырал болушлукъну эл мюлк товар чыгъарыучулагъа жетдирирге себеплик этеди», - дегенди Россельхозбанкны Къабарты-Малкъар Республикада бёлюмюню таматасы Алим Сокуров.  

2023 жылда 10 январьда Россельхозбанкны Къабарты-Малкъар Республикада бёлюмюню  кредитле бериучю бохчасыны ёлчеми 550 миллион сомгъа жетгенди.  

Россельхозбанкны Къабарты-Малкъарда бёлюмю республиканы фермерлерине эм эл мюлк товар чыгъарыучуларына ахчадан сора башха жаны бла болушлукъ этеди. Алагъа деп ишлерин, ол санда сатыу алыуларын да, тийишлисича бардырыргъа шёндюгюлю заманны излемлерине келишген цифралы майданла къуралгъандыла. Ол майданлада 77 мюлк  эм энчи предприятие эсепге тюшгенди, деп билдиргендиле сагъынылгъан финанс учрежденияны пресс-службасындан.

Бизни корр.