Ипотекагъа алгъан фатар ючюн тынгылы ремонт этиу тёлеуню берирге керекмиди?

Россей Федерацияны Жашау журт кодексини 153-чю статьясыны биринчи кесегине тийишлиликде, жашау журтла эмда коммунал жумушла ючюн гражданла бла организацияла заманында эмда толусунлай тёлеп турургъа борчлудула, дейдиле КъМР-ни Тарифле эмда жашау журтлагъа надзор этиу жаны бла къырал комитетинде.

Башхача айтханда, фатарны иеси юйню жумушларына къарагъан, кезиулю ремонт этилген ючюн ахча тёлерге керекди. Аны юсюне тынгылы ремонт этиу эмда коммунал жумушла ючюн тёлеуле да къошуладыла. Кодексни ол статьясыны экинчи кесегинде айтылгъаннга кёре, бу борчла адамгъа фатаргъа иеликге киргени бла салынадыла. Тынгылы ремонт ючюн а сегиз ай озгъандан сора тёлеп башларгъа керекди. Кеси да регионну законлары бла башха заман тохташдырылмагъан эсе, алай.

Тынгылы ремонтха тёлеуню юсюнден айтханда, аны бермезге талай сылтау барды. Сёз ючюн, юй тозурагъаннга эмда оюлуп кетерилирге тийишли болгъаннга саналса, ол кеси неда орналгъан жери къырал (неда жер-жерли) власть органланы оноуу бла къыралгъа неда муниципалитетге керекли болгъаннга саналып, бийленирге тийишли болса, оноу этилген айны ызындан келген айдан башлап, фатарланы иелери ол тёлеуден эркин этиледиле (ч. 2 ст. 169 ЖК РФ).

Кёп фатарлы юйде жашагъанла, тынгылы ремонт ючюн тёлеулерин энчи счётха жыяргъа оноу этип, къыралны субъектини закону бла анда жыйылыргъа тийишли ахчаны эм аз ёлчеми тохташдырылгъан эсе, ол мардагъа жетгенден сора адамла келишип, ахча жыйыуну тыяргъа оноу этерге эркиндиле. Алай борчлары болгъанла уа аны бериуден къутуллукъ тюйюлдюле (ч. 8 ст. 170 ЖК РФ).

Юйде регион программаны болжалындан алгъа тынгылы ремонтну бир кесеги этилген эсе, кесине да бюджетден неда регион операторну бохчасындан ахча къоратылмай алай, ол ишлеге къоратылгъан ахчаны артда бериллик тёлеуледен кетерирге керекдиле.

Энди уа ипотекада болгъан фатарны юсюнден айтайыкъ. 122-ФЗ номерли «Жеринден тепдирилмеген мюлкге иеликни эмда аны юсю бла келишимлени регистрациясыны юсюнден» Федерал законну (1997 ж. 21 июль) биринчи статьясында айтылгъаны, ипотекагъа сатып алыннган фатарны иесини эркинликлерин чеклейди, алай закон бла белгиленнген борчларындан а, ол санда быллай тёлеулеринден да эркин этмейди. «Ипотеканы юсюнден» 102-ФЗ номерли Федерал законну (16.07.1998 ж.) 30-чу статьясына тийишлиликде, ипотека келишимде башха зат айтылмай эсе, фатарны алай сатып алгъан адам аны жумушларына кереклисича къараргъа, ол санда кезиулю эмда тынгылы ремонт этерге да борчлуду.

Улбашланы Мурат хазырлагъанды.
Поделиться: