Жашы да атасы тутхан ыздан таймайды

Жашауларын электроэнергетикагъа жоралагъан Шаумурзаланы Курашны бла аны жашы Тимурну юсюнден керти да жарыкълыкъны адамлары, жюрек жылыу берген, билеклик эте билгенле дерге боллукъду.

Тимур 6-чы разряды болгъан электрослесарьды. Энергетик «Каббалкэнергону» Элбрус районда бёлюмюнде ишлейди. Усталыкъны сабийлигинде окъуна сайлагъанды. Сёзсюз, атасы Шаумурзаланы Дауутну жашы Курашны халкъ арасында жюрюген сый-намысы да къошумчулукъ этгенди анга.

Совет аскерде къуллукъ этип къайтханындан сора Кураш Ленинградда профтехучилищеде «электромеханик» усталыкъны алады. Туугъан республикасына къайтханындан сора Тырныауузда вольфрам-молибден комбинатда онжети жылны электромонтёр болуп урунады. Ызы бла 1986 жылда районну электросетьлерине кёчеди. Анда отуз жылны ичинде да пенсиягъа чыкъгъынчы   бёлюмню алчы специалисти болуп уруннганды, жаш коллегаларына насийхатлыкъ этип.

«Районда ток ызланы хар метрин биле болур ол. Авария къалайда болгъанын бек женгил тохташдырады, ишни эм иги амалы къаллай болурун олсагъат ангылап, мадар эте биледи», - дейдиле аны юсюнден биргесине ишлегенле.

Энергетикни тирилиги, къармашыулугъу аны жашына юлгю болгъанды. Тимур 1996 жылда Тырныауузда тийишли билим алып, ызы бла районну электросетьлеринде урунуп башлагъанды.

Шаумурзаланы юйюрюнде ишлеринден сора да китап окъуугъа энчи эс бурулады. Кураш уллу китапхана жыйгъанды. Айтхылы философланы чыгъармаларын, совет литератураны, тыш къыралланы авторларыны китапларын сюйюп окъуйду. Анда алгъан билимни, терен акъылны сабийлерине, туудукъларына, аны оюмун сураргъа келген, жетишимлерин эмда жарсыуларын айтыргъа сюйген жаш коллегаларына да туура этеди. Ол кимге да сёз таба биледи. Пенсиягъа чыкъгъанындан сора да, коллегалары ючюн жууаплылыкъны сезгенлей турады.

«Ишден чыкъгъанлыкъгъа, аны юсюнден унутуп къойгъан энергетик болмайды. Бу усталыкъ - жюрекден келген итиниулюкдю, адамлагъа чыракъны жарыгъын келтирген ма аллай!»  - дейдиле аны юсюнден тенглери.

Улбашланы Мурат хазырлагъанды.
Поделиться: