Школланы тынгылы жангыртыу программа андан ары барады

2023 жылда 1,5 минг школда тынгылы жангыртыу жумушла толтуруллукъдула. Аладан 363-сюнде тапландырыу ишле былтыр башланып, быйыл битдирилликдиле. Аны юсюнден бизге «Единая Россияны»   регион бёлюмюню пресс-службасындан бидиргендиле.

Партияны башламчылыгъы бла бу жумушлагъа бюджетде  ахча салыннганды. Партияны Генсоветини секретары Андрей Турчак айтханыча, жангыртыу ишлеге ата-анала, окъуучула, устазла да къатышырыкъдыла.

Школланы болумларын игилендириу иш къалай баргъанын а Къырал Думаны, регионлада законла чыгъарыучу органланы депутатлары тинтгенлей турлукъдула. «Ата-аналаны комитетлерин къураргъа керекди. Ала уа проектни дизайнындан башлап, къурулуш бошалгъынчыгъа дери битеу тамамланнган ишлеге къарап турлукъдула. Сынау кёргюзтгенича, ата-анала, сабийле, устазла школда кереклени башхаладан иги беледиле, аны экинчи юйлерине къалай айландырыргъа боллугъун кимден да иги ангылайдыла»,-дегенди ол.

 Тапландырыу ишлени бардыргъанда спорт заллада партияны «Zа самбо»  проектини  чеклеринде сабийле спортну бу тюрлюсю бла кюреширча мадарла къураргъа боллугъун да айтханды Андрей Турчак. Ол школлагъа Уллу Ата журт урушну, энчи аскер операцияны Жигитлерини атларын атаргъа, аланы суратларын мекямланы къабыргъаларына тагъаргъа боллугъун да белгилегенди.  «Жарыкъландырыу министерство бла «Жигитни партасы» проектни жашауда андан ары бардырыргъа керекди. Бюгюнлюкде уа ол 10 мингден аслам россейли школда сингдирилгенди»,-деп эсгертгенди.

Былтырны эсеплерин чыгъара, Андрей Турчак программаны болушлугъу бла 1274 школ тапландырылгъанын айтханды.  24 школда къурулушла бошала турадыла. Партияны оноучусу артха къалгъан, программа битдирилмей къалыргъа къоркъуу болгъан субъектлени белгилеп, аланы башчыларына эс бурургъа, болжалланы бузгъан  къуллукъчуланы жууапха тартыргъа  чакъыргъанды.

Белгили этилгенича, чырмаула конкурсла заманында бардырылмагъанлары бла байламлыдыла. Аны эсге алып, быйыл программаны чеклеринде келишимлени 20 мартдан кеч къалмай къабыл кёрюрге кереклиси къаты айтылгъанды. 

  «Единая Россия» школаны тынгылы жангыртыу жаны бла эм иги сынауну тизмесин къураргъа белгилейди. Анга битеу жумушланы заманында эм тынгылы бардыргъан организацияла кирликдиле. Борчларын кереклисича толтурмагъанланы тизмеси уа Жарыкъландырыу министерствону сайтында басмаланыпдыла.

Къыралда билим бериу учрежденияланы тынгылы жангыртыуну программасын жарашдырыуну юсюнден башламчылыкъны  Владимир Путин партияны съездинде этгенин эсгертирге сюебиз. Ол партияны  халкъ программасына киргенди. Битеу къыралда 7,2 мингден аслам школ тынгылы жангыртылыргъа кереклиси ачыкъланнганды.

 Программаны жашауда бардырыугъа былтыр 66,5 миллиард сом къоратылгъанды. Быйыл а анга 25 миллиарддан аслам бёлюнюрюкдю.

 «Жангы школ» партия проектни республикада жамауат советини башчысы, КъМР-ни Жарыкъландырыу эм илму министерствосуну управлениясыны таматасы Марина Мизованы айтханына кёре, былтыр конкурс бардырылып,  50 школ сайланнганды.

- Аны бла бирге 2023 жылда субсидиялагъа къошакъ сайлау бардырылгъанды. Анга кёре, «Билим бериу» миллет проектни чеклеринде энтта 9 школну мекямын тапландырыргъа онг чыкъгъанды. Алай бла уа 2022-2023 жыллада федерал бюджетден бу жумушлагъа   2 942 478,4 минг сом бёлюнеди. Ол санда 2022 жылда  – 1 355 144,6 минг сом, быйыл а     – 1 587 333,8 минг сом,-дегенди  Мизова.