Озгъан жыл кёп жумушла тамамланнгандыла

  КъМР - ни саулукъ сакълау министри Рустам Калибатов  пресс - конференцияда озгъан жылда не зат этилгенин эм 2023-чю  жылда не магъаналы ишле тамамланырыгъын белгилегенди.

Озгъан жыл министерство бардыргъан ишге бийик багъа берилгенди:  коронавирус жайылгъан кезиуде халкъны саулугъан сакълау жаны бла Россейде бек иги ишлегеннге КъМР - ни  саулукъ сакълау министерствосу саналгъанды. Битеуроссей конкурсда хар регионда бардырылгъан иш терен тинтилгенди, бизни республикада врачла борчларын бийик даражада толтургъанлары, билимлиле болгъанлары чертилгенди.

Журналистле ремонт баргъан медицина учрежденияла не халда болгъанларын соргъандыла. Рустам Калибатовну айтханына кёре, сегизисинде да ишле бошалгъандыла, январь айдан башлап алада саусузланы багъып башларыкъдыла.

Ремонт бла чекленип къалмай, бир - бир учреждениялагъа медицина аппаратура да берилликди: жангы рентген аппаратла, УЗИ, эндоскопла. Дагъыда коронавирус инфекция жайылгъан кезиуде берилген онюч КТ эм юч МРТ аппаратла да  бек жарайдыла.

Рустам Калибатов бусагъатда онкодиспансерни къурулушу къыстау баргъанын билдиргенди. Белгилисича, эски мекям бек тарды, анда шёндюгю излемлеге кёре ишлерге онгла жокъдула. Мекямдан сора да, онкологланы жетишмегенлери да бек уллу проблема болуп тургъанды, алай министр бу кемчилик да кетериле тургъанын чертгенди, жангы специалистле ишге алыннгандыла. Озгъан жылда диспансерде жангы операционный зал да ачылгъанды, анда жангы технологияла бла хайырланырча хар зат да тап къуралгъанды.

Онкодиспансерни жангы мекямы битгенден сора да эски юй да хайырланнганлай турлукъду.

Пресс- конференцияда врачла нек жетишмегенлерини юсюнден  да айтылгъанды. Министрни оюмуна кёре, районлада, элледе ишлерге сюйгенле жокъдула, бийик медицина билим алгъанла барысы да Нальчикде стационарлада жерле излейдиле, тапмасала уа мычымай Москвагъа кетедиле. Болумну тюрлендирир муратда элледе, район аралада ишлейме дегенлеге неда фатарлары ючюн ахча тёлерге, неда жашау журт берирге оноу этилгенди. Алай бу къоранчла кимни боюнуна тюшерикдиле, район огъесе республикамы берликди ахча – алыкъа белгисизди.

Журналистле «Земский доктор» къырал программагъа кёре озгъан жыл ненча адам иш тапханларын да соргъандыла. Рустам Калибатов айтханнга кёре, 2022-чи жылда бу федерал программагъа кёре жыйырма бла тогъуз врач ишге тохташхандыла, 2019 – 2021 жыллада уа жюз бла он медицина ишчи республиканы эллеринде урунуп башлагъандыла. Анга да къарамай, специалистле районлада жетишмейдиле, бу проблема жаланда бизни республикада угъай, битеуда Россейде да эсленеди.

Рустам Калибатов 2023- чю жылда Бахсан районну Куба элинде амбулаторияны, Элбрус поселокда уа больницаны башланнган къурулушлары къыстау бардырыллыкъдыла, дегенди. Кенжеде да амбулатория ишлеп башларгъа умут барды.

Сёзсюз, бизни республикада медицина бек терк айнып барады. Министр айтханнга кёре, 2022 - чи жылда КъМР-де тюрлю-тюрлю палахланы медицинасыны арасы 1086 кере автомобильде, 70 кере уа вертолётда мычымай медицина болушлукъ керекли адамлагъа жетгенди.

Айныуну юсюнден айта, министр сабийлери болмагъан юйюрле энди кесибизни республикада ЭКО этип, насыпларын тапханларын чертгенди. Озгъан жыл аллай балачыкъланы саны токъсан тогъузгъа жетгенди, аладан онтёртюсю эгизчикледиле. Къабарты - Малкъар Шимал Кавказда сабийлени тууу жаны бла ючюнчю жерни алады, Перинатал ара Россейде бек игилени санындады.

Рустам Калибатов башланнган жылда да иш кёп болгъанын чертгенди, алай республикада бийик билимли специалистле аланы тамамлаяллыкълары баямды.