Тынгылы ремонт бла байламлы эсепле къууандырадыла

Кёп болмай КъМР-ни Транспорт эмда жол мюлк министерствосунда «Къоркъуусуз эм качестволу жолла» миллет проектге эм къырал программалагъа кёре,  тамамланнган жумушланы эсеплегендиле эм этилирге керек ишлени белгилегендиле.  Аны юсюнден бизге ведомствону   пресс-службасындан билдиргендиле.

Былтыр Къабарты-Малкъарда 170 километр чакълы жолгъа тынгылы ремонт этилгенди. Алай бла отуз беш элни орамларын жангыртыргъа онг табылгъанды. Ол санда жюзден аслам федерал эм регион магъаналы  участок  игилендирилгенди.   Ишлени кезиуюнде эм биринчи социал магъаналы  объектлеге баргъан жоллагъа эс бурулгъанды.   Алай бла былтыр жангыртыу ишлени кезиуюнде онюч республикалы  эм муниципал магъаналы жолну, саулай  42 километр тенгли бирде тынгылы ремонт ишле бардырылгъандыла.

КъМР-ни Башчысы   Казбек  Коковну буйругъу бла  «Гитче шахарланы  ара  жолларын игилендириу» программагъа кёре,  Май  эм Терк районлада да танг кесек  иш этилгенди.  Аны бла бирге тынгылы ремонт ишлени кезиуюнде  Нальчикде -  Ленин, Къулий улу, Шогенцуков, Къабарты эм Головко орамла да  жангыртылгъандыла. Тёбен Чегем бла Хушто-Сыртны арасында 12,5 километр чакълы жолгъа  да тынгылы ремонт этилгенди. Аны бла бирге мында жангыртыу ишле быйыл да  барлыкъдыла.  

 Транспорт эмда жол мюлк министерство жоллада къоркъуусузлукъну жалчытыугъа да  аслам эс бурады. Ол санда  70 километрде кече жарытырча мадар этилгенди,  юч мингден аслам белги, 368 минг метрде жорукъну билдирген ызла  эм 15 километрде темир буруула   тартылгъандыла. Дагъыда  сагъынылгъан кезиуде  республикада 13 кёпюр жангыртылгъанды.

Адамланы тилеклери эсге алынып, республиканы Башчысыны буйругъу бла  былтыр Чегем бла Черек ауузлагъа жюрюрге  жети жангы автобус алыннганды. «Нальчик» аэропортну терминалы эм арбазы  да айбатландырылгъанды, машинала сюелирча къошакъ халда жерле жарашдырылгъандыла эм сквер да  къуралгъанды. 

Быйыл «Къоркъуусуз республика» программаны чеклеринде жоллада,  адамла аслам жюрюген эм жыйылгъан жерледе элли камера орнатылып, аланы саны 1300 –ге жетдирилгенди.

Эсге сала айтсакъ, алгъаракълада бардырылгъан битеуроссей рейтиннге кёре, жолланы игилиги  бла  Къабарты-Малкъар беш алчы регионну санына киргенди. Алай бла быйыл ыразылыкъларын былтырдан эсе  он процентге  кёп адам билдиргенди.

Ведомствода айтханларыча, быйыл  тынгылы ремонт ишлеге энтта да 4,5 миллиардха жууукъ сом бёлюнюрюкдю. Анга 110 километр жол эм 250 метрден артыкъ кёпюрге къараллыкъды.   Андан сора да, отуз километрден аслам жерде  кече жарытырча чыракълы чыпынла орнатыллыкъдыла.

 

Курданланы Сулейман.
Поделиться: