Анасыны ызы бла

Почтада асламында тиширыула ишлегенлерин ким да эслеген болур. Нек эсе да,  ма аланы инбашларына тюшгендиле  почта бла байламлы жумушла. Ол а ауур жюкдю. Сууукъда, кюн аяусуз  къыздыргъанда, жауунда, къарда, бузлауукъда да алагъа посылкаланы, письмоланы, пенсияланы, башха керекли къагъытланы да жер-жерлеге жетдирирге тюшеди. 
Аланы не заманда да адамла ашыгъып сакълайдыла, алагъа сюйюп тюбейдиле.  Ала кёплеге сёз нёгер да боладыла, жарсыулары бар эсе, жапсарадыла, къууанчларына къууанадыла. Къайтып келселе уа, почтаны кесинде да – дуния бла бир иш. Кёпле анга чыдаялмайдыла. Жаланда жууаплылыкъны сезгенле, тёзюмлюле, халал жюреклиле къаладыла. Черек районну Къашхатау элиндеги почта бёлюмюнде оператор Гажонланы Асият ма аллайладанды. 
Ол анда ишлегенли  жыйырма тёрт жылдан атлагъанды. Тюзюрек айтсакъ, мектепни бошагъандан сора келгенди бери. Сёзсюз, Асиятны энчи окъуу юйню угъай да, вузну  бошап чыгъаргъа къолундан келлик эди, алай ол бу ишни сайлагъанды. Аны сылтауу да  бар эди: анасы жашаууну отуз беш жылындан артыкъ заманын бу жумуш бла байламлы этгенди.
– Мектепде окъугъанымда, анама почтагъа барып, аны ишлегенине къарап, бирде болушуп окъуна тургъанма. Ол ишин бек сюйгенди, аны тынгылы, айыпсыз да тамамлагъанды. Бир заманда уа банкда ишлерге окъуна чакъыргъандыла, алай юйреннген жеринден, коллективден   айырылыргъа унамагъанды. Алай бла пенсиягъа чыкъгъынчы мында ишлеп тургъанды. 
Элде ол танымагъан, билмеген адам жокъ эди. Посылка келип, иесине билдиргенден сора,  бир кесек мычыса,  телефон бла сёлешип неда юйюне окъуна барып айтыучусу эсимдеди. Ол заманда тюшюннген эдим почтачыны иши къыйын да, сейир да болгъанына. Не десек да, ол адамла бла байламлыды. Аллынга  кёп тюрлю инсан келеди. Аланы хар бирини сорууларына тынгылы жууапла берирге, ангыламагъан, билмеген затларын айтып ангылатыргъа  тюшеди, - дейди  Асият.
Таулу къыз бек алгъа почтада оператор болуп ишлегенди, андан сора аны  связь бёлюмню таматасына салгъандыла. Алай юйюрде  сабийле гитче болгъанлары бла байламлы, Асият  жууаплы ишден кетип,  газетлеге жаздырыу бёлюмге кёчеди. Озуп баргъан жылны экинчи, келе тургъан жангы жылны да биринчи жарымына быйыл газетлеге бла журналлагъа жазылыу ишге  оператор Гажонланы Асият жууаплы эди да, эки жолда да  почта бёлюм ол борчну тынгылы тамамлагъанын чертип айтырчады. «Заман» газетни жаздырыргъа да ол дайым болушуп турады. Аны ючюн биз да, редакцияны коллективи, анга бек ыразыбыз.
– Башха эллерибизни почта бёлюмлеринде ишлегенле да ол жумушха уллу кёллю болмайдыла. Газетлеге, журналлагъа жазылыу башланнганлай, биз да ангылатыу ишни бардырып тебирейбиз,-  дейди  ол бизни бла тюбешген кезиуде.
Асият  бла ушагъымда, ол кесини юсюнден артыкъ бек айтыргъа сюймегенди, башхаланы махтаргъа кюрешгенди. «Районну Огъары Малкъар, Бабугент, Къашхатау эллеринде почта бёлюмледе  да ишлерин билген, анга жууаплы кёзден къарагъан, аны тынгылы тамамлагъан тиширыула ишлейдиле,-дейди ол. - Ала эллеринде жашагъанланы барысын да таныйдыла, бирде жаяулай элни бир къыйырындан башхасына   чыгъадыла. Кесигиз билгенликден, бизни эллерибиз таулу, тёшлю жерледе орналыпдыла. Аланы барысына да жаланда ыспас этерчады».
 
 
Холаланы Марзият.
Поделиться: