Насийхат сёзлери бизге багъалыдыла

Жабелланы Масхут огъурлу, эллилени араларында сыйы жюрюген  адамладан бириди.  Жылы саны келгенине да къарамай, тириди, бюгюнлюкде да машинаны кеси жюрютеди, узакъды, жууукъду демей, бир дууаны къоймайды. «Адамны къууанчына бармасанг да, бушууундан а къалма», -  дейди.
Масхут  Чегем ауузунда  Думалада туугъанды. Бюгюнлюкде Огъары Малкъарда жашайды, Мусукланы  Хажибекирни къызы Зухура бла жети сабий ёсдюргендиле. Ала бирер жерде бет жарыкълы урунадыла. Масхут бла Зухура бюгюн насыплы аппа , амма болуп, туугъан-туудукъгъа къууанып жашайдыла.  Айтханымча,  рульгъа олтуруп, Огъары Малкъардан Булунгугъа баргъанны  къыйынсынмайды. Сёзю кимге да бал жакъгъанлай,  жууугъу, ахлусу да ариу кёредиле аны. Мени да узагъым тюйюлдю, анамы къаршы жууугъуду, аны себепли къайда кёрсем да, бек тансыкълайма.
Масхут «Заман» газетни  да шуёхуду, редакциягъа келирге да бек сюеди, биз аны сакълаучубузну да сезе болур. Кёчгюнчюлюкден къайтханлы газетибизни бир жыл да къоймагъанды жаздырмай. Редакцияда ишлегенлени бирин къалмай таныйды. Келип айтыр амалы болмаса да, телефон бла сёлешип, керек жерде махтай, бирде уа тырман да эте, аллай бир керти окъуучубузду. 
Газетни окъугъандан тышында да, ол жазылгъанны сюзген этеди. Аны магъанасын толусунлай бизге айтады. Ол таныгъанла, аны билгенле да кёпдюле республикада, аны себепли кимни юсюнден жазсакъ да, бир къошумчулукъ этип да айтыр. Жамауатны сюйген адамды. Кёп жылланы ичинде элде терк  болушлукъ керекли машинада ишлеп тургъанды. Бюгюнлюкде  Огъары Малкъарда ветеран организацияны  бир керти адамыды.Элде оноугъа аны излейдиле. Намысы, сыйы бийикдеди. 
Бу кюнледе да ол, редакциягъа келип, кёп насийхат сёзле айтханды, келе тургъан Жангы жыл бла алгъышлагъанды. Газетни тиражы аслам болгъанына да къууаннганын билдиргенди. «Таулу ёз тилинде чыкъгъан жангыз газетни нек жаздырмагъанына бек сейир этеме»,- дейди ол. Аны бла бирге газетде чам хапарла басмалай турурубузну, сёзберлерибизни, бир онг бар эсе, уллуракъчыкъ этип чыгъарлыгъыбызны тилегенди. «Алгъын назмула да басмаланыучу эдиле, аланы да къайтарсагъыз, иги боллукъ эди», - деп, аллай затланы да белгилеп кетгенди.
Жабел улу «Заман» газетде ишлегенлеге, аны бла бирге республиканы жамауатына да алгъыш этгенди, дуния тынчлыгъын эм саулукъ тежегенди.  Биз да сыйлы таматабызгъа сау бол, газетни бетлеринде энтта кёп жылланы иги хапарла окъуй тур, дейбиз.
 
 
Шауаланы Разият.
Поделиться: