«Жюн чындайла - аякъларын, бюсюреу сёзле уа жюреклерин жылытырла»

Бу кюнледе Х.М.Бербеков атлы Къабарты-Малкъар къырал университет бла Шимал-Кавказда «Си-Мед» жаякъ-бет, пластика хирургия эмда стоматология  илму-практика ара   биригип,  республиканы Башчысы  Казбек Коковну буйругъуна тийишлиликде  Херсон областьны Скадовский муниципал  округда къуллукъ этген аскерчилеге   гуманитар  болушлукъ жыйышдыргъандыла. Аны  Стоматология  эмда  жаякъ-бет институтну директору, профессор Мустафаланы Магомет, аны орунбасары, медицина илмуланы кандидаты Холаланы Ибрагим да  элтип, тийишли адамлагъа бергендиле.   Ала,   жашауларына къоркъуу  уллу болгъанына да къарамай, жюкню керекли жерге жетдирип къайтхандыла. 

«Гуманитар жюгюбюзню асламысы  мингден артыкъ  жюн чындайдан къуралгъанды. Аланы биз Черек, Чегем, Бахсан районлада, Хасанияда жашагъанладан сатып алгъанбыз. Дагъыда  солдатлагъа деп тютюнле, конфетле  да элтгенбиз. Институтну студентлери уа чындайланы  ичлерине аскерчилеге  жюреклеринде болгъан огъурлу сёзлери  бла письмола жазып салгъандыла. Жюн чындайла - аякъларын, бюсюреу сёзле уа  жюреклерин жылытырла, бютюн кёллендирирле деп ийнанабыз»,-дегенди  Мустафа улу.