Элбрус кинематографистлени кесине тартады

Тау жерлени кинематографистле  сюйюп сайлайдыла. Минги тауну тийресинде да кёп фильмле алыннгандыла. «Вертикаль»  аладан бириди. Ол альпинистлени Элбрусха ёрлеулерини юсюнден хапарлайды.  Анда атлары кенг айтылгъан Владимир Высоцкийни, Лариса Лужинаны, Маргарита Кошелеваны, Геннадий Воропаевни, Александр Фадеевни кёрюрге боллукъду. «Вертикаль» Владимир Высоцкийге альпинистлеге жораланнган жырларын къураргъа илхам бергенди, аладан тёртюсюн - «Песня о друге», «Военная песня», «Вершина», «Прощание с горами» - граммофон пластинкалада жазылгъандан сора жамауат бек сюйгенди.

«Его звали Роберт» илму-фантастика фильмни бир кесегин жангызда Минги тауда угъай, «Иткъол» къонакъ юйде бла Тырныауузда алдыргъандыла. Баш жигитлени рольларын а белгили артистле Олег Стриженов, Марианна Вертинская, Михаил Пуговкин ойнагъандыла. Фильм Санкт-Петербургдан алим сынау халда космосну тинтирге адамгъа ушагъан роботну къурашдыргъаныны, анга Роберт деп атагъаныны юсюнден хапарлайды. Алай Роберт, аны бойсунууундан чыгъып, кёп кюлкюлю болумгъа тюшеди…

 «Миг удачи» спорт драмада уа къыралны тау лыжа спортдан алгъыннгы чемпионуну къадары кёргюзтюледи. Анда актёрла Николай Караченцов, Борис Щербаков, Лидия Константинова, Юрий Визбор, Владислав Ковальков, Марина Трошина, Владимир Кручинин эм башхала ойнагъандыла.

«Медный ангел» фильмде да кёп белгили артистле ойнагъандыла:Анатолий Кузнецов, Ирина Шевчук, Валентин Смирнитский, Леонид Ярмольник, Леонид Куравлёв, Александр Филиппенко, Николай Ерёменко-младший, Лия Ахеджакова эм башхала. Фильмде уа ООН-ну мурдорунда халкъла ара геология экспедиция Латин Американы къыралларыны биринде къыйын тау районда гидроэлектростанция ишлер мурат бла тинтиуле бардырады. Анга башчылыкъны совет инженер этеди. Алай аланы «сол» правительствону кетерирге излеген «Правый альянс» илишаннга алады. Фильм сейир, сагъайып къарарча кезиуледен байды. 

«Завтрак с видом на Эльбрус» мелодрамалары 90-чы жыллада алыннганды. Ол Юрий Визборну хапарына кёре салыннганды.  Анга къарагъан адамла Минги тауну ариу къарлы этеклеринден кёз алалмагъанлары баямды. Фильмни бир кесеги уа Чегетде «Ай» ашханада окъуна тюшюрюлгенди. Мында артистле Игорь Костолевский, Вера Сотникова, Михаил Филиппов, Вениамин Смехов, Татьяна Рудина эм башхала ойнагъандыла.

Бу киноленталаны араларында 70-чи жыллада алыннган «Всадник с молнией в руке» тарых драманы да сагъынмай жарамаз.  Ол  вольфрамны биринчи тапхан геолог Вера Флёрованы жашау жолуну юсюнден билдиреди.