8-17-жыллыкъ сабийлеге тёлеулени 51 303 юйюр аладыла

8-17-жыллыкъ сабийлери болгъан юйюрлеге ай сайын берилиучю ахча – файдалары жашау этерге керекли ахчаны эм аз ёлчемине жетмеген ата-аналагъа къыралны жанындан болушлукъну тюрлюсюдю. РФ-ни Президенти аны юсюнден буйрукъну къабыл кёргенли бу ахчаны Къабарты-Малкъарда 51 303 юйюр аладыла, деп билдиредиле Пенсия фондну регионда бёлюмюню пресс-службасындан. 

Юйюр бу ахчаны алыр ючюн, талай жорукъ толтурулургъа тийишлиди. Эм алгъа, юйюрню файдасы адамгъа жашау этерге керекли ахчаны эм аз ёлчеминден озмазгъа керекди, бизни республикада ол 14 894 сомду. Тёлеуню тохташдыргъанда юйюрню бир жылгъа файдасы тергеледи, алай ол болжал заявление берилген тёрт айгъа алгъа башланады. Башхача айтханда, сиз пособияны алыр ючюн, заявленияны 2022 жылны ноябринде берсегиз, файдагъыз 2021 жылны июлюндан башлап 2022 жылны июнуна дери саналырыкъды. Декабрьде барсагъыз, 2021 жылны августундан башлап 2022 жылны июлюна дери файдагъызгъа къараллыкъды. Юйюрню файдасын тергегенде, аны тепдирилген эм тепдирилмеген мюлкю да салыннган мардадан озмазгъа, аны келечилери уа Россейни гражданлары болургъа тийишлидиле.  

Тёлеуню тохташдырыуну юсюнден заявленияны ата не ана, сабийни опекуну берирге боллукъдула. Аны ючюн къырал жумушланы порталында электрон халда заявленияны толтурургъа неда Пенсия фондну жер-жерли бёлюмюнде клиент службагъа барыргъа керекди. Бу жумушну Кёп функциялы арада да тамамларгъа жарарыкъды.

Инсан жангызда заявленияны жазаргъа тийишлиди, битеу керекли документлени фонд ведомствола аралы байламлыкъла жюрютюуню чегинде органладан бла организацияладан кеси аллыкъды. Къошакъ данныйле юйюрде аскерчиле, къутхарыучула, кюч ведомстволада къуллукъ этген, грантла, стипендияла эм илму бла юйретиу учреждениялада окъугъанла бар эселе, сураллыкъдыла.