Жаш тёлю палата ишини эсеплерин чыгъаргъанды

КъМР-ни Парламентини кюз арты сессиясыны ахыргъы жыйылыуунда Жаш тёлю палатаны ишини эсеплери чыгъарылгъандыла. Ала бла депутатланы палатаны башчысы Екатерина Борисевич шагъырей этгенди.

Жаш тёлю палатаны 7-чи чакъырылыуу ишлегенин айтырчады. Аны къауумуна 50 жаш адам киреди, аладан эм кичиге 19, таматагъа уа 35 жыл толгъанды.

Екатерина Борисевич айтханыча, жаш депутатла тири ишлегендиле. Жылны ичинде 3 законопроект хазырланнганды, дагъыда 19 тюрлю-тюрлю жыйылыу бардырылгъанды, алагъа 1,5 мингден аслам адам къатышханды.

- Палата «Жаш парламентарий» программаны башламчысы болгъанды. Аны чеклеринде жаш депутатла Парламентни комитетлерини башчылары эм аланы орунбасарлары бла тюбешиуле бардыргъандыла. Быллай байламлыкъла уа бизге уллу сынау болгъандыла. Келир жыл Россейде Устазны жылыча белгиленирикди. Аны себепли  проектибизни андан ары бардырыргъа сюебиз,-дегенди ол.

Законопроектлени юслеринден айтханда, жаш депутатла КъМР-ни Конституциясына, жаш тёлю политиканы юсюнден республикалы законнга тюзетиуле хазырлагъандыла. Дагъыда «РФ-де жаш тёлю политиканы юсюнден» федерал законнга тюрлениуле да жарашдыргъандыла.

Жылны ичинде палатаны башламчылыгъы бла тюрлю-тюрлю жумушла бардырылгъандыла. Сёзге, «Жаш тёлю предпринимательствону айнытыу» темагъа «тёгерек столну» ишине жюзден аслам адам къатышханды, аланы арасында алимле, студентле да бар эдиле. Дагъыда ачыгъан адамгъа биринчи медицина болушлукъ бериуню жорукъларына юйрениуле да къуралгъандыла.

- Таулу тилде «Кеси оюн» викторинаны магъаналы жумушладан бирине санаргъа боллукъду. Анга орта классланы окъуучулары къатышхандыла, оюн жаш адамланы   ана тилге сейирлерин къозгъар мурат бла бардырылгъанды,-дегенди ол.

Жаш тёлю палата жыйылыуларын къуру Нальчикде угъай, районлада да бардыргъанды. Ол а элледе жашагъан жаш адамланы жамауат жашаугъа къатышдырыр мурат бла этилгенди. Аллай жумушланы арасында Яникойда футболдан биринчиликни, Псыгансуда «Тенг ушакъ» тюбешиуню белгилерге боллукъду.

Жаш парламентарийле  наркотиклеге къажау профилактика ушакъла, къан бериу жаны бла акция бардыргъандыла. Жумушланы арасында экологиягъа энчи эс бурулгъанды. Жаш адамланы тёгерекдеги табийгъатха ие кёзден къараргъа юйретиуге  «Таза Къабарты-Малкъар» акция, «Шёндюгю заманны экология жарсыулары» конференция жораланнгандыла.

Келир жыл тамамларгъа белгиленнген ишни юсюнден айтханда, Жаш тёлю палатаны юсюнден болумгъа тюрлениуле хазырларгъа, Сабийлени бла жаш тёлюню россейли къымылдауу, Жаш тёлюню ишлери жаны бла министерство бла файдалы байламлыкъла къураргъа  белгиленедиле. РФ-ни Президетини «Россейде тёрели адет-къылыкъ, ниет хазнаны сакълаугъа бурулгъан къырал политиканы къабыл кёрюуню юсюнден» Указын жашауда бардырыу мадарла да хазырланадыла.

КъМР-ни Парламентини спикери Татьяна Егорова, докладны сюзе, Жаш тёлю палата кесини тирилигин кёргюзтгенин чертгенди.