Уллу кёллю болмайыкъ

Жангы жылны байрамы жетип келеди. Кёпле аны пиротехниканы хайырлана белгилерге сюедиле. Жарсыугъа, ала бла байламлы кёп жарсыулу ишлени да билебиз. Аны сылтауу уа фейерверклени тийишли къагъытлары болмагъан сатыучуладан алыуду. Быллай продукцияны тийишли сертификатлары болгъанладан алыргъа керекди. Нек дегенде быллай тюрлю товарны кереклисича сакълау бек магъаналыды. Ол мылы неда бютюнда къургъакъ жерледе турургъа жарамайды.

- Фейерверклени тышлары мылы болуп жарамайды. Аланы къачан эм ким чыгъаргъанларыны юсюнден толу информация да болургъа керекди. Сатыучу да аланы хайырланыу инструкция бла алыучуланы шагъырей этерге керекди. Бир къауум шартлагъа эс бёлдюрюрге да, керек болса, -  деп белгилегенди РФ-ни МЧС-ини КъМР-де Баш управлениясыны надзор эм профилактика этиу жаны бла инспектору Алан Дзугулов.

Алай бла фейерверклени жиберирден алгъа аладан адамлагъа хата жетмезча этерге керекди. Кенг, башы жабылмагъан жерни белгилеп, гражданланы да андан кенгде тохташдырыргъа. Салютланы къаты жерде, тёгерегин да топуракъ бла бегитип орнатыргъа керекди. Дагъыда къар тёбеледе да салыргъа болады.

Хар атдырлыкъ фейерверкни хайырланыу инструкция бла уа энчи шагъырейлениу керекди. Алай бла кесигизни, башхаланы да жарсыулу болумдан сакълаяллыкъсыз.