Биз къууанчлы хапарла айтыучуладанбыз

«Заман» газетни бюгюннгю номерини биринчи бетинде РФ-ни Президентини Шимал-Кавказ федерал округда толу эркинликли келечиси Юрий Чайканы Къабарты-Малкъар Республикагъа иш бла келгенини юсюнден материалны окъургъа боллукъду. Юрий Чайка энчи белгини – «Жигит ана» орденни Элбрус районну Бедик элинден Ахматланы Анджелагъа тутдургъаныны юсюнден материал да бу бетдеди. Дагъыда мында КъМР-ни Башчысы Казбек Коковну Къоркъуусузлукъну федерал службасыны ишчилерини бла ветеранларыны профессионал байрамлары бла алгъышлауу да басмаланады.

«Сабий чыгъармачылыкъны «Кюн шахар» академиясындан», Бахсан шахар округну сабий чыгъармачылыкъ арасындан сабийле, школчула эм жаш тёлю къымылдауланы келечилери КъМР-ни Парламентини депутатларында къонакъда болгъандыла. Аны юсюнден материалны экинчи бетде кёрюрге боллукъду.

Ючюнчю бетде «Каббалкэнергону» таматасыны орунбасары – тамата инженери Алибек Яганов бла интервью басмаланады, ол Энергетикни кюнюне жораланып хазырланнганды. Тишлеге бакъгъан врач Тебердиланы Расул а бу кюнледе Индияда бардырылгъан Битеудуния Стоматология конгрессге къатышханды. Жерлешибизни жетишимлерини юсюнден хапарлагъан материал да мындады. Черкесск шахарда сурат галлереяда уа «Нартланы жерлерини байлыгъы» деген кёрмюч ачылгъанды. Анга Къабарты-Малкъардан эм Къарачай-Черкесден атлары айтылгъан художникле бла бирге жаш суратчылада да къатышханларыны юсюнден жазады мында бизни журналистибиз.

Тёредеча, тёртюнчю бет тюрлю-тюрлю магъаналы жангылыкъладан байды.