Сакълыкъны хайырлы амаллары

Спортну экстремал тюрлюлерин сюйгенле жыл сайын республикада Минги тауда жыйыладыла. Аллай кезиуледе къутхарыучуланы да ишлери кёп болады, хар кюнден ала ачыгъанлагъа болушлукъгъа чыгъадыла.

Таулада аз да жангылыу саулукъгъа заран салыргъа боллукъду. Аны бла байламлы МЧС-ни регионда Баш управлениясы экстремал спортчулагъа талай эсгертиу этеди:

- сноубордда бла сноубордингде шлемни хайырланыу уллу магъананы тутады: бир жанындан ол адамны башын  чып тюшюуден сакълайды, бирси жанындан а къаты желде  апчымазгъа болушады;

- спорт бла кюреширик жеригизге атланырдан алгъа, жууукъларыгъызгъа неда шуёхларыгъызгъа къайры баргъаныгъызны айтыгъыз;

- телевизорда кёрген трюкланы къайтарыргъа кюрешмегиз. Аланы толтургъан адамла профессионал халда жарау этедиле, жылла бла юйренедиле;

- керек болса, болушлукъ чакъыралырча, мобильный операторла ишлеген жерледен узакъгъа кетмегиз. Сотовый телефонугъузну биргегизге алыргъа унутмагъыз, ол суу болмазча неда бир зат тийип сынмазча, ич хуржуннга салыгъыз;

- учуугъа жангызда ол мурат бла хазырланнган жолланы сайлагъыз, белгилеге къараргъа унутмагъыз.

Эсигизде болсун: хатадан кери этерик жаланда сакълыкъды.