Мураты – кишиде болмагъан кийимле тигергеди

КъМР-ни Шогенцуков атлы  Къырал драма театрында «Мисс Къабарты – Малкъар – 2022» деген ариулукъну миллет конкурсуну финалы ётгенди. Эришиуню ётдюрюуде да бу жерни сайлау бошдан тюйюл эди. Нек дегенде бу конкурсну тарыхында миллет энчиликлени эсге ала быллай ариулукъну байрамы биринчи кере ётеди. Аны «KAMBI PRODUCTION» продюсер арады.

 Быйылгъы конкурсха 12 къыз къатышхандыла. Ала къонакъланы алларына тёрели къысха  жыйрыкълада угъай, миллет чепкенледе чыкъгъандыла. Жыйрыкъла хар бир  къызны да  ариулукъларын  бла энчиликлерин белгилегенин  а битеу жыйылгъанла да эслегендиле. Аны юсюнден социальный сетьледе да жазгъанла кёп болгъандыла. Адамла быллай эришиу республикада жашагъан халкъланы энчиликлери бла бардырылгъанын бек жаратхандыла.

-Проектни форматындан саулай да кетип да къалмагъанбыз. Биз республикада адетле бла тёреле къаты сакъланнганларын эсибизге алгъанбыз эм бу конкурсну битеу жашагъанлагъа да сейир болурча жангы форматда биринчи кере кёргютгенбиз, - деп чертгендиле конкурсну продюсери бла режиссёру  Амир Камбиев.

Конкурсну жорукъларына кёре, къызла къуру кеслерини ариулукъларын угъай, акъылларын да кёргюзтгендиле. Республиканы халкъларыны адет-тёрелерин билиулерин, энчиликлерин ачыкълагъандыла. Битеу ол эришиуледен сора уа  жюри юч хорлагъанны айыргъанды.   

Алай бла ючюнчю жерни  Лаура Шадова алгъанды. Ол 2008 жылда Чегем районда  «Мисс Дюймовочка» конкурсда хорлагъан эди. Эм сюйген иши аны сурат ишлеген бла фортепианода ойнайуду. Жюрегинде уа Лаураны энчи жерни уа итле бла киштикле аладыла.

Экинчи жерге Екатерина Чапаева чыкъгъанды. Ол Гуманитар-техника колледжни экинчи курсунда окъуйду. Сабийлигинден бери бальный тепсеуле бла кюрешип келедиле. Шёндю ол КъМКъУ-ну «Каллисто» деген ансамбльни солисткасыды.

Биринчи жерге уа жюри Гюлюйланы Зульфияны тийишли кёргенди.  Зульфияны дизайнер болуп, эксклюзив быстыр тикген ателье ачар мураты барды.