Ток бла тынгылы жалчытыу тёлеулеге кёреди

Кёп болмай «Россети Северный Кавказ»-«Каббалкэнерго» биригиуню келечилери рейдни кезиуюнде Нальчикде  санатор-курорт бёлюмде ишлеген предприятияладан бири бир къауум айны эсеплеген приборсуз хайырланнганын ачыкълагъандыла. 

Алай бла ишчи къауум  учреждение  1,1 миллион киловатт сагъатны урлагъанына акт жазгъандыла. Ахча бла алып айтханда уа, электрокюч комплексге 7,4 миллион сом къоранч салыннганды. Анга кёре энди аманлыкъчы (таматаны бетинде) закон бла телерик ахчадан  иги да кёп къоратыргъа тюшерикди эм уголовный иш ачылыргъа къоркъуу да барды. Энергетикле ачыкъланнган шарт бла байламлы материалланы ич ишлени органларына  бергендиле. 

Эсге сала айтсакъ, эркинликсиз, ол санда эсеплеген приборсуз токну хайырланнганла (урлагъанла) административ эм уголовный жууапха тартыладыла. Анга кёре, энчи иелиле 10-15 эм организацияла уа 100-200 минг сом тазир тёлерге тюшерикдиле.

Андан сора да, эки айдан аслам тёлемеген абонент  ток ыздан кесилирге боллукъду.  Аллай адамгъа  ток бла жалчытылыныр ючюн борчун толсунлай жабаргъа тюшерикди. Ол санда ток жипни кесгенлерине эм къошханларына да кеси тёлерикди. Аны ёлчеми  объектни къыйынлыгъына кёре  болады. Сёз ючюн,  энчи арбазны иеси 3 минг, организацияны таматасы уа  10 минг сом берликди. Уголовный жууапха тартылгъанла уа РФ-ни Уголовный кодексини 165 -чи статьясына тийишлиликде эки жылгъа тутулургъа боллукъдула. 

Хайырланылгъан ток ючюн заманында этилген тёлеулени  себеплиги  бла республиканы электрокюч бёлюмю ишин тынгылы бардырады, ол санда ток бла сылтаусуз жалчытырча эм аны качествосун ёсдюрюрча мадарла  этиледиле.