Урунуу законлагъа жангычылыкъла хазырланнгандыла

«Единая Россия» Урунуу министерство бла бирге бир-бир законлагъа  тюзетиуле хазырлагъандыла. Алагъа тийишлиликде, иш бла жалчытыу органланы жумушлары бла хайырланыргъа боллукъланы тизмеси кенгертилгенди, жаш адамланы иш бла жалчытыу онгла къуралгъандыла.

Законну проекти ишсизликни профилатикасына бурулупду. Жангы низамгъа кёре, иш бла жалчытыу организацияланы жумушлары бла бир жерде да ишлемегенле,  урунуу жерин алышыргъа сюйгенле, неда къуллугъундан эркин этилирге боллукъла да хайырланаллыкъдыла.    

Партияны башчысы Дмитрий Медведев профильли министерствону, Россейни жалынчакъсыз профсоюзларыны эм Россейни предпринимательлерини бла иш бериучюлерини союзуну келечилери бла хазырланнган тюзетиулени сюзгенди. «Урунуу жорукълагъа автоматизацияланнга амалла сингдириледиле. Аны ючюн а бир-бир усталыкъла жокъ боладыла. Алгъын иш тапхан къыйын болгъанды. Алай энди уа халкъны иш бла жалчытыу араланы онглары бла ишчи жерлерин алышыргъа сюйгенле да хайырланаллыкъдыла»,-дегенди партияны оноучусу.

Законнга инсаннга бизнес ачаргъа болушлукъ, жамауат ишле ючюн тёлеуле дегенча ангыламла кийирилгендиле. Андан сора ла РФ-ни жангы регионларында инсанланы эмда мобилизация бла аскерге чакъырылгъанланы урунуу гарантиялары да тохташдырыладыла.

Партияны халкъ программасыны «Ахшы иш – юйде къолайлыкъ» бёлюмюню жашауда бардырыугъа жууаплы, партияны фракциясыны таматасыны орунбасары Андрей Исаев жангы закон партияны халкъ программасы эмда урунуу рынокну шёндюгю излемлери бла келишгенин белгилегенди. Документни юсюнден айтханда, анга «къуллугъундан эркин болургъа къоркъуулу ишчи»  ангылам кийирилгенди.   Дагъыда   иш бериучюлени кёллендириу низам да барды.

 - Жаш адамлагъа энчи эс бурулады. Бюгюнлюкде халкъны иш бла халчытыу арагъа ол тийреде жашагъан адам келирге боллукъ эди. Энди уа инсан шёндю жашагъан, тургъан жерде хайырланыргъа боллукъду учрежденияны онглары бла. Энчи предпринимательле, самозанятыйле, тюрлю-тюрлю сылтаула бла жумушланы толтургъанларын тохтатсала, ишсиз статусну, тёлеулени алыргъа  эркиндиле,-деп ангылатханды Исаев.

Урунуу жаны бла законлагъа мобилизация бла аскерге чакъырылгъанланы юйюрлерини келечилерин ишге алгъанланы  кёллендириу мадарла  кийирилирге боллукъдула.   

Алгъаракълада уа «Единая Россия» Урунуу кодексге дистанция халда ишлегенле бла байламлы жорукъла къошулгъандыла. Дагъыда «Россейди иш»  портал къуралгъанды, анда уа къыралда битеу вакансияла басмаланадыла. Къырал Дума партияны депутатлары хазырлагъан законланы   да къабыл кёргенди: мобилизациягъа тюшгенле, аланы юйюрлерини эркинликлери жаны бла. Сёзге, белгиленнген къауумла жашау журт-коммунал мюлк ючюн борч жыйылгъанда, тазирледен эркин этилгендиле. 

- Урунуу рынокну болумун партия контрольда тутады. Ишлеген адам кеси, жууукълары, саулай жамауат ючюн жууаплылыкъны сезеди. Аны ючюн а урунуу бла байламлы онгланы кенгертирге, адамла хакъ, социал болушлукъ алырча, налогланы тёлерча мадарла керекдиле. Алай бла ол жамауатха себеплик этеди. Юйюрюне уа къолайлыкъ келтиреди,-дегенди законнга тюзетиулени юслеринден РФ-ни Къырал Думасыны КъМР-ден депутаты Виктория Родина.