Казбек Коков Урунууну жигити Исхакъ Машбаш бла тюбешгенди

КъМР-ни Башчысы Казбек Коков Россей Федерацияны Урунууну жигити, Адыгея, Къабарты-Малкъар, Къарачай-Черкес республикаланы халкъ жазыучусу Исхакъ Шумафович Машбаш бла тюбешгенди.

«Исхакъ Шумафович Къабарты-Малкъарны жууаплы жумуш бла жокълагъанды. Ол кесини шуёхуна, КъМАССР-ни халкъ поэти Къулийланы Къайсынны хурметине жораланнган эсгериу ингирге къатышыргъа келгенди. Исхакъ Шумафовични бери келиую кёп миллетли уллу Россейни халкъларыны араларында шуёхлукъну кючлерге къошумчулукъ этиуюдю. Ол Къабарты-Малкъарда назмуларын хар инсан билген айтхылы поэтге эм жазыучугъа намыс бергени ючюн ыразылыгъымы билдиргенме.

Андан сора да Исхакъ Шумафовични кеси жазгъан романына кёре «Графиня Аиссе» деген кинофильмини чыкъгъаны бла алгъышлагъанма. Кинолента экранлада ноябрьде кёргюзтюлгенди. Ары белгили россейли актерла къатышхандыла, баш рольну уа кинону эм театрны актрисасы Къабарты-Малкъарда ёсген Светлана Мамрешева ойнагъанды. Аиссени сабий заманыны сыфатын Даяна Яхутль кёргюзтгенди.

Исхакъ Шумафович манга аны романына кёре кинофильм къалай салыннганын айтханды. Биз кёп халкъла жашагъан Россейде хар миллетни да маданият хазнасын сакълауну магъанасыны юсюнден сёлешгенбиз. Кёп тюрлю эм сейир россейли бай маданиятны айнытыууна уллу къыйын салгъаны ючюн Исхакъ Шумафовични «Къабарты-Малкъар Республикагъа-100 жыл» деген майдал бла саугъалагъанма. Эсигизге салайым, Машбашны къыйынына эм бийик саугъаны 2019 жылда бизни Президентибиз Владимир Владимирович Путин «Россей Федерацияны Урунууну житити» деген алтын жулдузну бергенди.

Исхакъ Шумафовичге саулукъ эм чыгъырмачылыкъ ишде Россей ючюн кёп жылланы ишлерин тежегенме», - деп жазгъанды Казбек Коков кесини телеграм-каналында, деп билдиредиле республиканы оноучусуну пресс-службасындан.