Хыйла бла колхозну тозуратханды

Къабарты-Малкъарда эл мюлк предприятияны алгъыннгы къуллукъчусуну аманлыкъчы ишлери ючюн тутулгъанды.

ФСБ-ны КъМР-де Управлениясы республикада МВД бла бирге «Петровла» атлы колхозну алгъыннгы къуллукъчуларындан бири, хыйлалыкъ этип, предприятияны тозуратыр чекге жетдиргенин тохташдыргъандыла, деп билдиредиле ФСБ-ны КъМР-де Управлениясыны пресс-службасындан.

Ачыкъланнган шартлагъа кёре, аманлыкъчы, предприятияны 15 миллион сомдан аслам борчу болгъанын биле тургъанлай, колхозну правленинден ол халны жашыргъанды. Алай бла кредит борч бютюн бек ёсюп, предприятие банкрот болгъанды.

Россейни Следствие комитетини Прохладнада районла аралы бёлюмю Уголовный кодексни 159-чу статьясыны 4-чю кесегине эм 196-чы статьясыны 1-чи кесегине кёре уголовный иш ачханды. Быллай аманлыкъ иши ючюн исанны эркинлиги алты жылгъа дери сыйырылыргъа боллукъду.