Уста гёжеф, жигит къутхарыучу

Чечен Республикада къатыш единоборстволадан «ACA Young Eagles 31» атлы турнир бардырылгъанды. Анда 66 килограмм ауурлукъ къауумда биринчи жерни  бизни республикадан Жаппуланы Альберт алгъанды. Турнирни баш сермешинде ол биринчи раундда окъуна, бууу приёмну хайырланып, чеченли гёжефни хорлагъанды.

Жаппуланы Альберт ич службаны капитаныды, МЧС-ни 22-чи номерли от тюшюуге къажау-къутхарыу бёлюмюню башчысыды. Альберт къыйын болумлада алгъан уллу сынамы, службагъа жууаплы кёзден къарагъаны, бирге ишлеген нёгерлери бла шуёхлукъ жюрюте билгени, аны бла бирге уа салыннган борчланы тамамлауда къатылыгъы, тюзлюкню сюйгени бла белгилиди. Аны спортда жетишимлерини юсюнден айтханда, ол къол тюйюшден бла аскер къол тюйюшден спортну устасыды, битеуроссей эришиуледе саугъаланнганланы къауумуна кирмей къалмайды, чемпион атына тийишлилигин хорламлары бла кёгюзтгенди.