Кавказда эм ариу тиширыуну сайларыкъдыла

Келир жылда 15 декабрьде Нальчикде «На коляске без барьеров» регионла аралы жамауат организация арбачыкълада жюрюген сакъат тиширыуланы арасында «Краса Кавказа» деген конкурсну бардырыргъа сюйгенин айтханды. Ол Россейни юг жанында биринчи кере ётдюрюллюкдю, - деп билидириледи КъМР-ни Культура министерствосуну пресс-службасындан. 

– Бизни социал магъаналы проектлени бардырыу жаны бла уллу сынамыбыз барды. Кёп кере федерал эм регионал конкурслагъа къатышып, грантлагъа тийишли бола тургъанбыз. Ол санда жыл сайын бардырылгъан «Невская Краса» ариулукъ эм хунерлик жаны конкурсну жетинчи кере ётдюргенбиз. Аны эсеплерине кёре, саулукъларында чекленнген онглары болгъан эм сакъат тиширыуланы кёллерин кётюрюрге ол ахшы себеплик этеди. Ала жангы компетенцияла бла шагъырейленедиле, кёбюрек адамны таныйдыла эм иш къоллу болургъа онг табадыла, - деп билдиргендиле «На коляске без барьеров» организацияда.   

Жамауатчыла айтханнга кёре, «Невская Краса» конкурсха тюрлю-тюрлю жыллада Шимал Кавказны келечилери да къатыша тургъандыла. Сёз ючюн, Инна Аненкова  2019 жылда  хорламгъа тийишли болгъанды. Андан сора оргкомитетге ишлерге чакъырылгъанды эм ингилиз тилден кесини школун ачханды. Ася Ахриева да оргкомитетини келечисиди эм «На коляске без барьеров» конкурсну кураторуду. Анна Дарган да «Невская краса-2023» конкурсну оргкомитетини келечисине айырылгъанды. Ол   журналист, преподаватель болуп ишлейди. Кеси да «Жылны тиширыуу» премиягъа тийишли болгъанды. 

– Аланы юлгюлери конкурсну къыйматлыгъын шарт ачыкълайдыла. Аны хайыры бла тиширыула насыпларына жол ачалгъандыла. Претни Кавказда бардырыллыгъы уа анга сагъынылгъан энчи категориядан аслам тиширыу къатышырча эм жашаугъа кёллерин ачарча аламат себеплик этерикди, - деп къошхандыла оргкомитетде.