«Элбрус» спорт школгъа - 15 жыл

Минги тауну этегинде «Элбрус» спорт школ ачылгъанлы быйыл 15 жыл толгъанды. Ол бутийреде тау лыжала бла кюрешгенден тышында дагъыда грек-рим тутушууну бла боксну айнытырча онгла да болгъанына ахшы юлгюдю.

Школ Элбрус поселканы администрациясыны алгъыннгы башчыларындан бири Курданланы Узейирни башламчылыгъы бла къуралгъан эди. Ол жаш тёлю спорт бла кюрешип, ахшы жетишимле болдурурларына энчи эс бёлгенди.

- Элде ары дери да бар эди боксдан секция. Алай анда жарау этерча тийишли онгла жокъ эдиле. Сора Курдан улу алгъыннгы сабий садны мекямына ремонт этдиреди, ринг да сатып алады. Эркин тутушуудан да секция ачылгъан эди. Алай бизде мында «классиканы» бегирек сюйгенлери себепли тутушууну ол тюрлюсю сакъланмагъанды, -дейди аны директору Апсуаланы Альберт. 

Бокс бёлюмде кюрешип башлагъанланы биринчи тёлюсюнден а ахшы кёрюмдюле бла къууандыргъан спортну устасы Балаланы Назирди. Ол скандинавия къыраллада, Израильде, Италияда «А» класслы халкъла аралы турнирледе, универсиадалада, Россейни Сауутланнган кючлерини чемпионатларында, Россейни Боксдан федерациясыны кубогу ючюн эришиуледе жаланда алчы жерле ала келеди. Спортну устасы Зураб Квициани да ол халли жетишимлери бла бизни хаман къууандыргъанлай турады. Дагъыда спортну устасына кандидат Джаппуланы Расулну да энчи белгилерчады.

Россей даражалы турнирледе Хаджиланы Ислам, Текуланы Альберт, Будайланы Омар хорламлары бла къууандыргъанлай турадыла. Жашла тренерле Этезланы Хусейде, Акъболатланы Зупарда, Боташланы Эльдарда жарау этедиле.

Жыл сайын школда 130 чакълы жаш адам юйренедиле. Жангы келгенле башланнган къауумну санында башлап, ызы бла уа окъуу-жарау этиу къауумгъа кёчедиле. Кеслериниги кёргюзтгенле уа эришиулеге хазырланнганланы санына айырылып, тюрлю-тюрлю эришиулеге къатышып башлайдыла.

Онбеш жылны ичинде бу школ Россейни спортдан устасы деген атны жюрютген экеуленни эм сегиз да спортну устасына кандидатны хазырлагъанды. Биринчи разрядлыла да ондан асламдыла.  

Апсуаланы Альберт белгилегенича, Элбрус элни администрациясы алагъа хаман болушлукъ тапдыргъанлай турады.